Vivo X300 Pro-ը ճանաչվել է շուկայում լավագույն տեսախցիկով սմարթֆոնը

Vivo X300 Pro սմարթֆոնը ճանաչվել է լավագույն կամերաֆոն՝ հեղինակավոր Versus մեդիայի անցկացրած կույր թեստի արդյունքներով։ Թեստավորման արդյունքները հրապարակվել են YouTube-ում, որտեղ դիտողները գնահատել են տարբեր սմարթֆոններով արված լուսանկարները՝ առանց իմանալու, թե որ սարքով են դրանք նկարահանվել։

Մրցույթին մասնակցել են 12 ֆլագմանային մոդելներ՝ ներառյալ iPhone 17 Pro Max-ը, Galaxy S25 Ultra-ն, Google Pixel 10 Pro XL-ը, Sony Xperia 1 VII-ը, OnePlus 15-ը և Xiaomi 17 Pro Max-ը։ Կույր քվեարկության արդյունքում Vivo X300 Pro-ը հավաքել է 47 տոկոս ձայն՝ փոքր առավելությամբ առաջ անցնելով Pixel 10 Pro XL-ից, որը ստացել է 45 տոկոս։

Թեստի ընթացքում iPhone 17 Pro Max-ը հաղթել է Xiaomi 17 Pro Max-ին, սակայն հետագայում դուրս է մնացել մրցույթից՝ պարտվելով Pixel 10 Pro XL-ին։ Անակնկալ արդյունք է գրանցել նաև Nothing Phone (3)-ը, որը հաղթել է Huawei Pura 80 Ultra-ին, սակայն եզրափակչում ստացել է ընդամենը 8 տոկոս ձայն։ Ավելի վաղ տեխնոբլոգեր Մարկես Բրաունլին iPhone 17-ը նշել էր որպես 2025 թվականի լավագույն սմարթֆոն։