Windows 11-ի նոր թարմացումը անվանել են «կատաստրոֆա»

Windows 11 օպերացիոն համակարգի հունվարյան թարմացումը լուրջ քննադատության է արժանացել բազմաթիվ տեխնիկական խափանումների պատճառով։ Windows Latest պարբերականի փոխանցմամբ՝ KB5074109 անվանումը կրող պարտադիր թարմացումը պարունակում է զգալի թվով սխալներ, ինչի համար մեդիայի խմբագիր Մայանք Պարմարը այն բնութագրել է որպես «կատաստրոֆիկ» և «մղձավանջային»։

Նրա խոսքով՝ Microsoft-ը արդեն իսկ ընդունել է մի շարք խնդիրների առկայությունը։ Մասնավորապես՝ արձանագրվել են խափանումներ Outlook փոստային ծառայության աշխատանքում, խնդիրներ քնի (sleep) ռեժիմի հետ, ինչի հետևանքով համակարգիչը հնարավոր չէ անջատել, ինչպես նաև Citrix Director գործառույթի սխալներ։ Չնայած թարմացման վերջերս թողարկվելուն՝ ընկերությունը արդեն հաստատել է առնվազն երեք լուրջ խնդիր։

Windows Latest-ը նշում է, որ օգտատերերի դժգոհությունները շարունակաբար ավելանում են, իսկ իրավիճակը բարդացնում է այն հանգամանքը, որ KB5074109 թարմացումը պարտադիր է և հնարավոր չէ հրաժարվել դրա տեղադրումից։ Սպասվում է, որ Microsoft-ը խնդրի մի մասը կշտկի հաջորդ թարմացման միջոցով, որը նախատեսված է 2026 թվականի փետրվարի 10-ին։ Ավելի վաղ նաև հաղորդվել էր, որ Windows 11-ի թարմացումները որոշ համակարգիչների վրա հանգեցրել են կախվածությունների և սև էկրանի առաջացման։