Apple-ը պատրաստվում է թողարկել iPhone Air-ի երկրորդ սերունդը՝ չնայած առաջինի ձախողմանը

Apple-ը նախատեսում է արդեն 2026 թվականի աշնանը ներկայացնել iPhone Air սմարթֆոնի երկրորդ սերունդը՝ չնայած առաջին մոդելի թույլ վաճառքներին։ Այդ մասին Weibo-ում հայտնել է հայտնի ինսայդեր Fixed Focus Digital-ը՝ նշելով, որ ընկերությունը չի հրաժարվել նախագծից՝ սպառողների սահմանափակ հետաքրքրության ֆոնին։

Առաջին iPhone Air-ը առանձնացել էր չափազանց բարակ՝ ընդամենը 5,6 միլիմետր հաստությամբ կորպուսով, սակայն ուներ միայն մեկ տեսախցիկ և փոքր հզորության մարտկոց։ Մոտ 1000 դոլար արժողությամբ սարքը շուկայում համարվել է անհաջող՝ հենց տեխնիկական սահմանափակումների պատճառով։ Չինացի ինսայդերի տվյալներով՝ երկրորդ սերունդը կստանա միայն փոքր թարմացումներ և կրկին կմնա առանց երկրորդ տեսախցիկի։

Աղբյուրները նշում են, որ Apple-ը պատրաստվում է բացել առանձին հավաքման գիծ՝ նոր iPhone Air-ի արտադրության համար։ Wccftech-ի լրագրողները հիշեցնում են, որ ավելի վաղ մի շարք ինսայդերներ խոսել էին մոդելի թողարկման հնարավոր հետաձգման մասին՝ արտադրական հզորությունները ավելի հեռանկարային iPhone-ներին տրամադրելու նպատակով։ Միաժամանակ նշվում է, որ առաջիկա տարիներին Apple-ը կշարունակի սմարթֆոնների թողարկման փուլային ռազմավարությունը՝ նոր մոդելները շուկա հանելով տարբեր ժամանակահատվածներում։