ՄԷԱ-ն բարձրացրել է նավթի համաշխարհային պահանջարկի կանխատեսումը

Միջազգային էներգետիկական գործակալությունը (ՄԷԱ) բարձրացրել է նավթի համաշխարհային պահանջարկի աճի կանխատեսումները։ «Ինտերֆաքս»-ի փոխանցմամբ՝ գործակալությունը սպասում է, որ 2026 թվականին նավթի պահանջարկը կաճի օրական մինչև 932 հազար բարել։

ՄԷԱ-ի տվյալներով՝ 2025 թվականին նավթի պահանջարկը 2024 թվականի համեմատ աճել է օրական 847 հազար բարելով՝ նախապես կանխատեսված 835 հազար բարելի փոխարեն։ Արդյունքում նավթի համաշխարհային սպառման ծավալը աճել է օրական 103,92 միլիոնից մինչև 104,05 միլիոն բարել։ 2026 թվականի համար պահանջարկի աճի նախնական գնահատականը նույնպես վերանայվել է՝ 863 հազարից բարձրացվելով մինչև 932 հազար բարել օրական, իսկ 2025 թվականի միջին պահանջարկը սպասվում է 104,98 միլիոն բարելի մակարդակում։

Միևնույն ժամանակ նավթի համաշխարհային գները անցել են աճի՝ ԱՄՆ դոլարի թուլացման ֆոնին։ Լոնդոնի ICE բորսայում Brent տեսակի մարտյան ֆյուչերսների գինը աճել է ավելի քան 0,5 տոկոսով՝ հասնելով 64,52 դոլարի մեկ բարելի համար, իսկ ամերիկյան WTI նավթի պայմանագրերը թանկացել են մինչև 59,96 դոլար։ ԱՄՆ դոլարի ինդեքսի անկումը նպաստել է հումքային ապրանքների, այդ թվում՝ նավթի պահանջարկի աճին։