Ռուսաստանում դրական են գնահատել Դավոսում ՌԴ–ԱՄՆ շփումների մթնոլորտը

Ռուսաստանի և ԱՄՆ-ի միջև Դավոսում ընթացող բանակցությունների դրական համատեքստի մասին հայտարարությունները հուսադրող են։ Այդ մասին «Լենտա.ռու»-ին ասել է Պետդումայի միջազգային հարաբերությունների հանձնաժողովի առաջին փոխնախագահ Ալեքսեյ Չեպան՝ մեկնաբանելով կողմերի միջև շփումների ընթացքը։

Նրա խոսքով՝ նկատելի է, որ թե՛ ռուսական, թե՛ ամերիկյան կողմից հնչում են ազդակներ բանակցությունների շարունակության և կառուցողական տրամադրվածության մասին։ Չեպան ընդգծել է, որ չնայած առկա դիմադրությանը, երկխոսությունը շարժվում է խաղաղ ուղղությամբ, ինչը գնահատվում է որպես դրական միտում։

Ավելի վաղ Ռուսաստանի ուղղակի ներդրումների հիմնադրամի ղեկավար, նախագահի հատուկ ներկայացուցիչ Կիրիլ Դմիտրիևը հայտարարել էր, որ Դավոսում իր հանդիպումները կառուցողական են ընթանում, և ավելի շատ մասնակիցներ են սկսում հասկանալ Մոսկվայի դիրքորոշումը։ Նույնը հաստատել էր նաև ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆը՝ ռուսական կողմի հետ բանակցությունները բնութագրելով որպես «շատ դրական»։