Ուիթքոֆը հայտնել է Թրամփի «Խաղաղության խորհրդին» միանալու պատրաստակամ երկրների մասին

ԱՄՆ նախագահ Դոնալդ Թրամփի նախաձեռնած «Խաղաղության խորհրդին» միանալու պատրաստակամություն արդեն հայտնել են մի շարք պետությունների ղեկավարներ։ Այդ մասին CNBC-ին տված հարցազրույցում հայտարարել է Սպիտակ տան հատուկ բանագնաց Սթիվ Ուիթքոֆը։

Նրա խոսքով՝ նախաձեռնությունը ստացել է շատ դրական արձագանք։ «Ամեն ինչ հիանալի է ընթանում։ Կարծում եմ՝ արդեն 20, գուցե նույնիսկ 25 համաշխարհային առաջնորդներ համաձայնել են մասնակցել խորհրդին», — նշել է Ուիթքոֆը՝ չհստակեցնելով, թե որ երկրների մասին է խոսքը։

Սպիտակ տան ներկայացուցիչը հավելել է, որ Միացյալ Նահանգները առաջարկել է նաև Ռուսաստանին և Ուկրաինային միանալ նախաձեռնությանը և ակնկալում է, որ երկու կողմերն էլ կընդունեն հրավերը։ Ավելի վաղ Ուիթքոֆը հայտարարել էր, որ հունվարի 22-ին նախատեսում է հանդիպում Ռուսաստանի նախագահ Վլադիմիր Պուտինի հետ։