Երրորդ համաշխարհային պատերազմ չի լինի, Ռուսաստանը և Ուկրաինան ցանկանում են համաձայնության գալ․ Թրամփ

Ռուսաստանի նախագահ Վլադիմիր Պուտինը պատրաստ է լուծել Ուկրաինայի հետ հակամարտությունը, հայտարարել է ԱՄՆ նախագահ Դոնալդ Թրամփը Դավոսում կայացած Համաշխարհային տնտեսական ֆորումում։  

«Ես շփվում եմ նախագահ Պուտինի հետ, և նա ցանկանում է համաձայնության գալ։ Ես նաև շփվում եմ նախագահ Զելենսկու հետ, և կարծում եմ, որ նա նույնպես ցանկանում է համաձայնության գալ։ Ես այսօր հանդիպելու եմ նրա հետ։ Հնարավոր է, որ նա հիմա սենյակում է», - ասել է նա։

ԱՄՆ նախագահը շեշտել է, որ ինքը ձգտում է օգնել հակամարտության կարգավորմանը միայն մարդկային կորուստները կանխելու համար, բայց որ Եվրոպան, այլ ոչ թե ԱՄՆ-ն, պետք է աշխատի խաղաղ կարգավորման վրա։

«Նրանք չեն գնահատում այն, ինչ անում ենք։ Երբ ես խոսում եմ ՆԱՏՕ-ի մասին, խոսում եմ Եվրոպայի մասին։ Նրանք ստիպված կլինեն աշխատել Ուկրաինայի հետ կապված, բայց մենք՝ ոչ։ Միացյալ Նահանգները շատ հեռու է։ Մեզ բաժանում է մեծ, գեղեցիկ օվկիանոս։ Մենք դրա հետ ոչ մի կապ չունենք», - հավելել է Թրամփը։

Թրամփը նաև մեկնաբանել է Պուտինի և Զելենսկու միջև հարաբերությունները։ Նա ասել է, որ երկու նախագահները կիսում են «հսկայական, աննորմալ ատելություն»։ «Բայց Ռուսաստանը և Ուկրաինան ցանկանում են համաձայնության գալ <…> Մենք երրորդ համաշխարհային պատերազմ չենք ունենա։ Կարծում եմ, որ եթե ես չընտրվեի, Ռուսաստանի և Ուկրաինայի միջև հակամարտությունը կարող էր վերածվել երրորդ համաշխարհային պատերազմի», - ասել է նա՝ պատասխանելով լրագրողների հարցերին։