Ռուսաստանի Պետդումայում կարգելվի լուսանկարել պատգամավորներին

Ռուսաստանի Պետդուման «Коммерсантъ» պարբերականին տեղեկացրել է, որ սահմանափակումներ են մտցվել ֆոտոլրագրողների աշխատանքում: Այսօր, հակառակ սահմանված կարգին, լրատվամիջոցների լուսանկարիչներին թույլ չեն տվել ներկա լինել լիագումար նիստին:

Խորհրդարանի ստորին պալատի մամուլի ծառայությունում պարզաբանել են, որ նիստերի դահլիճի պատշգամբը, որտեղ սովորաբար աշխատում են լուսանկարիչները, սկզբնապես նախատեսված էր դաշնային հեռուստատեսության օպերատորների համար: Այսօր ուժի մեջ է մտել հենց այդ աշխատանքային ռեժիմը:

Նախորդ օրը Պետդումայի խոսնակ Վյաչեսլավ Վոլոդինը լիագումար նիստում հրապարակավ նկատողություն էր արել Դումայի լուսանկարիչներին՝ անտեղյակության և պատգամավորներին վատ լույսի ներքո ցույց տալու ձգտման համար: «Դուք ցանկանում եք, որ քաղաքական մշակույթը զարգանա խորհրդարանում, բայց ինքներդ սառել մնացել եք 90-ականներում կամ նույնիսկ 80-ականների վերջում,- ասել է Վոլոդինը:- Նախ ինքներդ ձեզ վերակառուցեք, հետո նոր գնահատական տվեք ուրիշներին»:

Ավելի վաղ «Единая Россия»-ն նախազգուշացում էր ուղարկել իր պատգամավորներին՝ ֆոտոլրագրողների կողմից նիստերի դահլիճում երկար ֆոկուսային օբյեկտիվների օգտագործման մասին: Խորհրդարանի անդամներին կոչ է արվել հիշել խոշոր պլանով լուսանկարվելու հնարավորության մասին։

Նախկինում լրագրողներն ունեին երկու պատշգամբ՝ մեկը լուսանկարիչների, իսկ մյուսը՝ դաշնային հեռուստաալիքների համար։ «Լուսանկարչական» պատշգամբը մի քանի տարի առաջ փակվել էր լրագրողների համար։ Ֆոտոլրագրողները տեղափոխվել են աջ կողմ, որտեղ հեռուստատեսային խմբերն են։ Մինչ օրս որևէ հայտարարություն չի եղել «լուսանկարչական» պատշգամբի վերաբացման մասին։ Դաշնության խորհուրդը վաղուց արգելք ունի լիագումար նիստերի դահլիճում լրատվամիջոցների լուսանկարիչների համար։

Հոկտեմբերին Վյաչեսլավ Վոլոդինը լուսանկարիչներին պարզաբանել է, որ նրանք աշխատում են «աշխարհի ամենաբաց խորհրդարանում». «Բրիտանական խորհրդարանում նրանց վաղուց կուղարկեին տաժանակիր աշխատանքների. կան լիակատար սահմանափակումներ։ Չի կարելի լուսանկարել պատգամավորին, եթե դա նրան վարկաբեկում է։ Իսկ այստեղ ինչ խելքներին փչի՝ անում են»։