Փրկարարներն օրեր առաջ ծննդկանին տեղափոխել էին հիվանդանոց․ այսօր անանցանելի ճանապարհով մորն ու երեխային հասցրել են տուն

Այսօր՝ հունվարի 22-ին, ՀՀ Ներքին գործերի նախարարության փրկարար ծառայության Արագածի հրշեջ փրկարարական ջոկատի փրկարարները Ռյա Թազա գյուղից դեպի Շենկանի գյուղ են տեղափոխել հունվարի 20-ին, իրենց կողմից «Արթիկ» բժշկական կենտրոն տեղափոխած և այնտեղ որդուն լույս աշխարհ բերած ծննդկանին և նորածին տղային։ Այս մասին հայտնում է Shamshyan.com-ը։

Չնայած տեղացած առատ ձյանը, ցրտին, սաստիկ բքին, երբ տեսանելիությունը մի քանի մետր էր, փրկարարները թրթուրավոր հատուկ տեխնիկայով ծննդկանին ու նորածնին ապահով ու անվտանգ հասցրել են գյուղ։

Ֆոտոլրագրող Գագիկ Շամշյանի հետ զրույցում ծննդկանի հարազատները ասում էին․ «Առատ ձյան ու անանցանելի ճանապարհների պայմաններում, երբ իրավիճակը կարող էր դառնալ վտանգավոր, փրկարարներն իրենց մասնագիտական ու մարդասիրական վերաբերմունքով մեր ընտանիքի համար իսկական փրկություն դարձան։ Նրանց օգնությամբ մեր հղին անվտանգ տեղափոխվեց հիվանդանոց, որտեղ լույս աշխարհ եկավ մեր արու զավակը։ Այնուհետև նույն հատուկ տեխնիկայով մեզ կրկին անվտանգ հասցրին Շենկանի գյուղ։

Սրտանց շնորհակալություն ենք հայտնում փրկարարներին՝ արագ արձագանքի, նվիրված աշխատանքի և մարդկային բարձր վերաբերմունքի համար։ Ձեր կատարած գործը մեր ընտանիքի համար անգնահատելի է»։