«Չորրորդ ինքնիշխանություն». Եռակողմ հանդիպում՝ Հովհաննիսյան, Արզումանյան, Օսկանյան

Թերթը գրում է. ««ՉԻ» տեղեկություններով երեկ «Սիվիլիթաս» հիմնադրամում հանդիպել են ՀՀ նախկին արտգործնախարարները՝ «Ժառանգություն» կուսակցության առաջնորդ Րաֆֆի Հովհաննիսյանը, «Ազատ դեմոկրատներ» կուսակցության ներկայացուցիչ Ալեքսանդր Արզումանյանը եւ «Սիվիլիթաս» հիմնադրամի նախագահ Վարդան Օսկանյանը։

Շրջանառվող խոսակցությունների համաձայն՝ երեք նախկին արտգործնախարարները միասին քննարկել են ընդհանուր ձեւաչափով դաշինք ստեղծելու հնարավորությունների հարցը։ Վերջիններս այս նախաձեռնության շրջանակներում կարեւորել են իրենց նախկին ստատուսը եւ դրանով պայմանավորված ընդհանուր հետաքրքրությունների պլատֆորմը։

Երեկ «Սիվիլիթաս» հիմնադրամից այս տեղեկությունը ոչ հաստատեցին, ոչ էլ հերքեցին։ Հիմնադրամի աշխատակիցը մեզ ասաց, որ ինքն իրավասու չէ պատասխանել մեր հարցին, իսկ նա, ով կարող է պատասխանել, օֆիսում չէ։ «Ժամը վեցից հետո աշխատանքային ժամն ավարտված է». ասաց նա, այնուամենայնիվ, խոստանալով մեր հարցն ու հեռախոսահամարը փոխանցել «Սիվիլիթասի» մամլո քարտուղարին։ Նրանից այդպես էլ զանգ չստացանք։

Ինչ վերաբերվում է Ալեքսանդր Արզումանյանին, ապա վերջինս չպատասխանեց մեր հեռախոսազանգերին»։