Թրամփը հայտարարում է Գրենլանդիայի նկատմամբ ԱՄՆ-ի «ամբողջական մուտքի» մասին․ ՆԱՏՕ-ն ուժեղացնում է Արկտիկայի օրակարգը

ԱՄՆ նախագահ Դոնալդ Թրամփը հայտարարել է, որ ՆԱՏՕ-ի հետ համաձայնության արդյունքում Միացյալ Նահանգները ստացել է Գրենլանդիայի նկատմամբ «ամբողջական և մշտական մուտք»։ Նրա խոսքով՝ պայմանավորվածությունը նախատեսում է Արկտիկայում անվտանգության ամրապնդում՝ Ռուսաստանի և Չինաստանի հնարավոր սպառնալիքները զսպելու նպատակով, իսկ ՆԱՏՕ-ի գլխավոր քարտուղար Մարկ Ռյուտեն նշել է, որ դաշինքի անդամները պետք է մեծացնեն իրենց ներգրավվածությունը տարածաշրջանում։

Միևնույն ժամանակ Գրենլանդիայի վարչապետ Յենս-Ֆրեդերիկ Նիլսենը հայտարարել է, որ կղզու ինքնիշխանությունը «կարմիր գիծ» է և չի կարող դառնալ բանակցությունների առարկա։ Նրա խոսքով՝ Գրենլանդիան պատրաստ է քննարկել համագործակցության և անվտանգության հարցեր, սակայն տարածքային ամբողջականության և ինքնիշխանության հարցում զիջումներ չեն կարող լինել։ Դանիայի վարչապետ Մետե Ֆրեդերիկսենը ևս շեշտել է, որ ՆԱՏՕ-ի հետ ինքնիշխանության շուրջ որևէ բանակցություն չի անցկացվել։

Եվրոպական միությունում իրավիճակը առաջացրել է լուրջ մտահոգություն՝ անդրատլանտյան հարաբերությունների ապագայի հարցում։ ԵՄ առաջնորդների գնահատմամբ՝ Գրենլանդիայի շուրջ զարգացումները խաթարել են վստահությունը ԱՄՆ-ի նկատմամբ, մինչդեռ Չինաստանը մերժել է պնդումները, թե իրեն պետք է դիտարկել որպես Արկտիկայում սպառնալիք՝ ընդգծելով, որ իր գործունեությունը համապատասխանում է միջազգային իրավունքին, հաղորդում է Reuters-ը։