Ծխելը մեծացնում է դեպրեսիայի ռիսկը․ գիտնականների նոր բացահայտում

Ծխելը կապված է դեպրեսիայի զարգացման ավելի բարձր ռիսկի հետ․ նման եզրակացության են եկել Մանհայմի Կենտրոնական հոգեկան առողջության ինստիտուտի գիտնականները, ինչպես հայտնում է BMC Public Health-ում հրապարակված հետազոտությունը։ Ուսումնասիրությունը ցույց է տվել, որ կյանքի ընթացքում դեպրեսիան ավելի հաճախ հանդիպում է ինչպես ներկայիս, այնպես էլ նախկին ծխողների մոտ՝ համեմատած նրանց հետ, ովքեր երբևէ չեն ծխել։

Հետազոտության շրջանակում վերլուծվել են գրեթե 174 հազար մարդու տվյալներ՝ 19-ից 72 տարեկան։ Մասնակիցները հայտնել են իրենց հոգեկան առողջության վիճակի, դեպրեսիայի ախտորոշումների և ծխելու սովորությունների մասին։ Պարզվել է, որ հատկապես բարձր ռիսկի խմբում են միջին տարիքի մարդիկ՝ 40–59 տարեկանները, իսկ օրական ծխվող սիգարետների քանակի ավելացման հետ դեպրեսիվ ախտանշաններն ավելի արտահայտված են դառնում, նշում են հեղինակները։

Միևնույն ժամանակ, ծխելուց հրաժարումը կապվել է հոգեկան վիճակի բարելավման հետ․ որքան երկար ժամանակ է անցել վերջին սիգարետից, այնքան ցածր է եղել դեպրեսիայի ռիսկը և այնքան հեռու՝ վերջին դեպրեսիվ դրվագը։ Թեպետ ուսումնասիրությունը չի հաստատում ուղիղ պատճառահետևանքային կապը, հեղինակների գնահատմամբ՝ արդյունքները կարևոր փաստարկ են ծխելու կանխարգելման և դրանից հրաժարվելու ծրագրերի օգտին, ինչպես ընդգծում է BMC Public Health-ը։