Գրենլանդիայի շուրջ համաձայնագրի նախագիծը նախատեսում է հրաժարում ԵՄ-ի դեմ նոր մաքսատուրքերից

Գրենլանդիայի վերաբերյալ համաձայնագրի նախագիծը, որը ներկայացրել է ՆԱՏՕ-ի գլխավոր քարտուղար Մարկ Ռյուտեն, ներառում է Վաշինգտոնի և Բրյուսելի միջև պայմանավորվածություն՝ միմյանց նկատմամբ նոր մաքսատուրքեր չկիրառելու մասին, հաղորդում է Politico-ն՝ հղում անելով եվրոպացի պաշտոնյաներին։ Ըստ նրանց՝ առաջարկի որոշ կետեր ներկայում կարող են ավելի շատ դիտվել որպես քաղաքական ակնկալիքներ, քան իրավականորեն ամրագրված պարտավորություններ, այդ թվում՝ նաև հետախուզման իրավունքների վերահսկման մարմնի ստեղծման գաղափարը։

Politico-ի փոխանցմամբ՝ Ռյուտեի ներկայացրած չորս կետերը նախատեսում են 1951 թվականի Գրենլանդիայի պաշտպանության մասին համաձայնագրի վերանայում, եվրոպական երկրների կողմից Արկտիկայում անվտանգության ուժեղացման խոստում, ինչպես նաև հակահրթիռային պաշտպանության համակարգերի վերաբերյալ նախկին պայմանավորվածությունների հարմարեցում։ Նախագծում առկա է նաև սցենար, որը վերաբերում է Գրենլանդիայի հնարավոր լիակատար անկախությանը Դանիայից։

ԱՄՆ նախագահ Դոնալդ Թրամփը Դավոսում Ռյուտեի հետ հանդիպումից հետո հայտարարել է, որ կողմերը դրել են ապագա համաձայնագրի հիմքերը և հավելել, որ չի մտադիր փետրվարից ուժի մեջ մտցնել Եվրոպայի մի շարք երկրների դեմ նախատեսված 10 տոկոսանոց մաքսատուրքերը։ Միևնույն ժամանակ CNN-ը հայտնում է, որ քննարկվող գործարքը կարող է ներառել ՆԱՏՕ-ի դերակատարության ուժեղացում կղզում և ԱՄՆ-ի հասանելիության ընդլայնում ռեսուրսներին, իսկ Axios-ի տվյալներով՝ նախագիծը չի ենթադրում Գրենլանդիայի ինքնիշխանության փոխանցում ԱՄՆ-ին՝ փոխարենը դիտարկվում է «Ոսկե գմբեթ» հակահրթիռային պաշտպանության համակարգի տեղակայումը։