Արտասահմանում «Мир» քարտի կիրառումը․ որ երկրներում է հնարավոր վճարել և կանխիկացնել

Ռուսական  «Мир» բանկային քարտերը ներկայում հնարավոր է օգտագործել ավելի քան տասը երկրներում, սակայն ոչ ամենուր և ոչ լիարժեք ծավալով, հայտնում է ՌԻԱ Նովոստի-ն՝ հղում անելով Ռուսաստանի զբոսաշրջային օպերատորների ասոցիացիային (ԱՏՈՐ)։ Ամենահարմար պայմանները ստեղծված են Բելառուսում, Աբխազիայում և Կուբայում, որտեղ  «Мир»-ը ընդունվում է գրեթե բոլոր տերմինալներում և բանկոմատներում, թեև որոշ երկրներում առկա են տեխնիկական սահմանափակումներ կամ ոչ շահավետ փոխարժեքներ։

Մի շարք պետություններում  «Мир» քարտերի կիրառումը սահմանափակ է առանձին բանկերով։ Մասնավորապես՝ Հայաստանում քարտերն ընդունում է միայն «ՎՏԲ Արմենիա»-ն, նույն իրավիճակն է Վիետնամում՝ ռուս-վիետնամական համատեղ VRB բանկի միջոցով։ Ադրբեջանում  «Мир»-ը գործում է «ՎՏԲ Ադրբեջան»-ում՝ կանխիկացման օրական սահմանաչափով, իսկ Ղրղզստանում, Տաջիկստանում և Թուրքիայում որոշ վճարումներ հնարավոր են նաև QR-կոդով՝ «ՎՏԲ Օնլայն» հավելվածի միջոցով, նշում է ՌԻԱ Նովոստի-ն։

Բացի այդ,  «Мир» քարտերով հնարավոր է կանխիկ գումար ստանալ Ղազախստանում, Տաջիկստանում, Լաոսում և Վենեսուելայի որոշ զբոսաշրջային գոտիներում, սակայն խանութներում և ռեստորաններում վճարումը հաճախ դժվար է կամ ուղեկցվում է բարձր միջնորդավճարներով։ ԱՏՈՐ-ում խորհուրդ են տալիս արտասահման մեկնող ռուս զբոսաշրջիկներին պարտադիր ունենալ կանխիկ գումար՝ մի քանի օրվա ծախսերի համար, քանի որ  «Мир» քարտերի կիրառման աշխարհագրությունը դեռևս մնում է սահմանափակ և անկայուն։