Բոլթոն․ Գրենլանդիայի շուրջ դեէսկալացիան ցույց է տալիս, որ Թրամփը հստակ ռազմավարություն չունի

ԱՄՆ նախկին ազգային անվտանգության խորհրդական Ջոն Բոլթոնը հայտարարել է, որ Գրենլանդիայի շուրջ իրավիճակի դեէսկալացիան վկայում է նախագահ Դոնալդ Թրամփի կողմից կղզու վերաբերյալ հստակ և երկարաժամկետ ռազմավարության բացակայության մասին, գրում է The Hill-ը։ Նրա խոսքով՝ Թրամփի վերջին քայլերը ցույց են տալիս ոչ թե հաշվարկված քաղաքականություն, այլ իրավիճակային արձագանքներ։

Բոլթոնը նշել է, որ ընդամենը մեկ օրվա ընթացքում զարգացումները հասել են կտրուկ շրջադարձի՝ այն հանդիպումից, որը Եվրոպայում որոշ շրջանակներ անվանում էին «Արևմուտքի ապագայի վերաբերյալ պատմական», մինչև Թրամփի կողմից իր երկու ամենալուրջ սպառնալիքներից հրաժարումը։ Նախկին պաշտոնյան ընդգծել է, որ նման վարքագիծը բնորոշ է առաջնորդի, ով գործում է առանց հստակ պլանի։

«Այստեղ որևէ ռազմավարություն չկա», — եզրափակել է Բոլթոնը՝ հույս հայտնելով, որ այս իրավիճակից համապատասխան եզրակացություններ կարվեն։ Ավելի վաղ ամերիկագետ քաղաքագետ Մալեկ Դուդակովը նույնպես հայտարարել էր, որ Վաշինգտոնը փաստացիորեն պարտություն է կրել Գրենլանդիայի հարցում և այժմ կենտրոնանում է կղզում ռազմական ներկայության ընդլայնման ու օգտակար հանածոների արդյունահանման շուրջ համաձայնությունների վրա։