Գազայի պատերազմի մասին «Հինդ Ռաջաբի ձայնը» ֆիլմը առաջադրվել է «Օսկար»-ի

Ֆրանս-թունիսցի ռեժիսոր Կաութեր Բեն Հանիայի «Հինդ Ռաջաբի ձայնը» վավերագրական-խաղարկային ֆիլմը առաջադրվել է «Օսկար»-ի՝ «Լավագույն միջազգային ֆիլմ» անվանակարգում, հայտնում է Al Jazeera-ն։ Ֆիլմը պատմում է հինգ տարեկան պաղեստինցի աղջիկ Հինդ Ռաջաբի իրական պատմությունը, որը զոհվել է Գազայում 2024 թվականին՝ իր ընտանիքի հետ քաղաքից տարհանման փորձի ժամանակ։

Ֆիլմում օգտագործված են իրական ձայնագրություններ Հինդի հեռախոսազրույցից Պաղեստինի Կարմիր Մահիկի ծառայության հետ, երբ նա վիրավորված ավտոմեքենայի մեջ էր՝ շրջապատված արդեն զոհված հարազատներով։ Փրկարարները փորձել են հանգստացնել աղջկան, սակայն ավելի ուշ նա ևս զոհվել է, ինչպես նաև երկու շտապօգնության աշխատակիցները, որոնք ուղևորվել էին նրան փրկելու։ Այդ ձայնագրությունը նրա մահից հետո լայնորեն տարածվել էր սոցիալական ցանցերում՝ առաջացնելով միջազգային վրդովմունք խաղաղ բնակչության դեմ հարձակումների կապակցությամբ։

Արձագանքելով առաջադրմանը՝ Բեն Հանիան հայտարարել է, որ ֆիլմի նպատակը Հինդ Ռաջաբի ձայնը ամբողջ աշխարհում լսելի դարձնելն էր, քանի որ նրա ձայնը ժամանակին չլսվեց։ Ռեժիսորի խոսքով՝ «կինոն միշտ չէ, որ փախուստ է իրականությունից․ այն կարող է լինել ճշմարտության մասին և այն մասին, ինչից չի կարելի շրջվել»։ Ֆիլմն արդեն արժանացել է Վենետիկի կինոփառատոնի ժյուրիի արծաթե մրցանակին, իսկ «Օսկար»-ի մրցանակաբաշխությունը կկայանա մարտի 15-ին Լոս Անջելեսում, հաղորդում է Al Jazeera-ն։