Ես իմ խոստացված ասուլիսը կտամ. Դիանա Գասպարյան

«Ժողովուրդ, ես իմ խոստացված ասուլիսը կտամ, խնդրում եմ եղանակային պայմաններն էլ հաշվի առեք»,- Հակակոռուպցիան դատարանում դատական նիստից հետո լրագրողների հետ զրույցում ասաց Էջմիածնի նախկին քաղաքապետ Դիանա Գասպարյանը՝ չցանկանալով պատասխանել հարցերին։

Նշենք, որ դատական նիստը չի լուսաբանվել։  24news-ի հաղորդմամբ, Դ. Գասպարյանն ու մեղադրյալի կարգավիճակ ունեցող նրա ամուսինն առարկել են, որպեսզի առհասարակ դատական նիստը լուսաբանվի` չնայած գործի հանրային հնչեղությանը: Դիանա Գասպարյանն իր խոսքում նշել է, որ առանց նկարահանելու ավելի անկաշկանդ կլինի: 

Հիշեցնենք, որ Հակակոռուպցիան դատարանը անցած տարվա դեկտեմբերի 29-ին ստացել է Էջմիածնի՝ ՔՊ-ական նախկին քաղաքապետ Դիաննա Գասպարյանի, նրա ամունսու, սկեսրայրի ու ևս երկու անձի վերաբերյալ քրեական գործը։ Գործի հետ որպես իրեղեն ապացույց դատավորին է հանձնվել երկու փաթեթ կնիքված վիճակում։ Գործը մակագրվել է դատավոր Սարգիս Պետրոսյանին։ 

Դ. Գասպարյանի գործով հինգ ամբաստանյալ կա, նրանց բոլորի նկատմամբ որպես խափանման միջոց է ընտրված բացակայելու արգելքը։ Դիաննա Գասպարյանի ամուսնու և ամուսնու հոր նկատմամբ կիրառվել է նաև գրավ։ Դատական նիստի օր դեռ նշանակված չէ։ Հիշեցնենք, որ Դիաննա Գասպարյանը քրեական գործն ու դրա շուրջ զարգացումները որակել է կրկես՝ խոստանալով տոներից հետո խոսել, հանգամանալից անդրադառնալ դրան։

Մեղադրական եզրակացության համառոտ բովանդակության համաձայն.

Դիանա Մնացականի Գասպարյանին մեղադրանք է առաջադրվել այն բանի համար, որ նա 2018 թվականի հոկտեմբերի 21-ից զբաղեցնելով Վաղարշապատ համայնքի ղեկավարի պաշտոնը, հանդիսանալով պաշտոնատար անձ՝ հանրային ծառայող, համայնքային ծառայության քաղաքական պաշտոն զբաղեցնող անձ, իր հետ փոխկապակցված անձանց Շահեն Շահինյանի և Աշոտ Միրզոյանի օժանդակությամբ իր իշխանական և ծառայողական լիազորություններն ու դրանցով պայմանավորված ազդեցությունն օգտագործել է ի վնաս պետական (համայնքային) և ծառայողական շահերի, կատարել է այնպիսի արարք, որը դուրս է իր լիազորությունների շրջանակից, որն էական վնաս է պատճառել պետության (համայնքի) օրինական շահերին, որի արդյունքում համայնքին պատճառվել է առանձնապես խոշոր չափերի գույքային վնաս, ինչպես նաև իր հետ փոխկապակցված անձ (ամուսնու հայրը) Աշոտ Արամայիսի Միրզոյանի, իր ամուսնու՝ Արամայիսի Աշոտի Միրզոյանի, իր հետ փոխկապակցված անձ Շահեն Շահինյանի և Սամվել Բադալյանի հետ նախնական համաձայնությամբ, իր իշխանական և ծառայողական լիազորություններն օգտագործելով իրականացրել է առանձնապես խոշոր չափերով փողերի լվացում:

Արամայիս Աշոտի Միրզոյանին մեղադրանք է առաջադրվել այն բանի համար, որ նա հանդիսանալով Վաղարշապատ համայնքի ղեկավարի պաշտոնը, զբաղեցրած անձ Դիանա Գասպարյանի հետ փոխկապակցված անձ (ամուսինը), հոր՝ Աշոտ Արամայիս Միրզոյանի, կնոջ՝ Դիանա Գասպարյանի, իր հետ փոխկապակցված անձանց Շահեն Շահինյանի և Սամվել Բադալյանի հետ նախնական համաձայնությամբ իրականացրել է առանձնապես խոշոր չափերով փողերի լվացում:

Աշոտ Արամայիսի Միրզոյանին մեղադրանք է առաջադրվել այն բանի համար, որ նա զբաղեցրած անձ Դիանա Գասպարյանի հետ փոխկապակցված անձ, Շահեն Շահինյանի հետ նախնական համաձայնությամբ միջոցներ տրամադրելու եղանակով օժանդակել է Դիանա Գասպարյանին՝ իր իշխանական և ծառայողական լիազորություններն ու դրանցով պայմանավորվորված ազդեցությունն ի վնաս պետական և ծառայողական շահերի օգտագործելուն, այնպիսի արարք կատարելուն, որը դուրս է նրա լիազորությունների շրջանակից, որն էական վնաս է պատճառել պետության օրինական շահերին և որի արդյունքում համայնքին պատճառվել է առանձնապես խոշոր չափերի գույքային վնաս, ինչպես նաև իր հետ փողկապակցված անձանց՝ Դիանա Գասպարյանի, Շահեն Շահինյանի, Արամայիս Միրզոյանի, և Սամվել Բադալյանի հետ նախնական համաձայնությամբ իրականացրել է առանձնապես խոշոր չափերով փողերի լվացում:

Շահեն Էդիկի Շահինյանին մեղադրանք է առաջադրվել այն բանի համար, որ նա, հանդիսանալով Վաղարշապատ համայնքի ղեկավարի պաշտոնը, զբաղեցրած անձ Դիանա Գասպարյանի հետ փոխկապակցված անձ, Աշոտ Միրզոյանի հետ նախնական համաձայնությամբ միջոցներ տրամադրելու եղանակով օժանդակել է Դիանա Գասպարյանին՝ իր իշխանական և ծառայողական լիազորություններն ու դրանցով պայմանավորվորված ազդեցությունն ի վնաս պետական և ծառայողական շահերի օգտագործելուն, այնպիսի արարք կատարելուն, որը դուրս է նրա լիազորությունների շրջանակից, որն էական վնաս է պատճառել պետության օրինական շահերին և որի արդյունքում համայնքին պատճառվել է առանձնապես խոշոր չափերի գույքային վնաս, ինչպես նաև իր հետ փողկապակցված անձանց՝ Դիանա Գասպարյանի, Աշոտ Միրզոյանի, Արամայիս Միրզոյանի, և Սամվել Բադալյանի հետ նախնական համաձայնությամբ իրականացրել է առանձնապես խոշոր չափերով փողերի լվացում:

Սամվել Զորիկի Բադալյանին մեղադրանք է առաջադրվել այն բանի համար, որ նա Վաղարշապատ համայնքի ղեկավարի պաշտոնը զբաղեցրած անձ Դիանա Գասպարյանի, նրա ամուսնու՝ Արամայիս Միրզոյանի, ամուսնու հոր՝ Աշոտ Միրզոյանի և իրենց հետ փոխկապակցված անձ Շահեն Շահինյանի հետ նախնական համաձայնությամբ իրականացրել է առանձնապես խոշոր չափերով փողերի լվացում: