Եվրոպայի խոշորագույն կենսաթոշակային ֆոնդը կրճատել է ԱՄՆ պետական պարտատոմսերում ներդրումները

Եվրոպայի խոշորագույն կենսաթոշակային ֆոնդերից մեկը՝ Նիդերլանդների ABP-ն, 2025 թվականին էապես կրճատել է ԱՄՆ գանձապետական պարտատոմսերում իր ներդրումների արժեքը, գրում է Reuters-ը։ Գործակալության տվյալներով՝ 2024 թվականի վերջից մինչև 2025 թվականի սեպտեմբերը ֆոնդի տնօրինության տակ գտնվող ամերիկյան պարտատոմսերի արժեքը նվազել է 29 միլիարդից մինչև 19 միլիարդ եվրո։

Reuters-ը նշում է, որ տվյալ ժամանակահատվածը համընկնում է ԱՄՆ նախագահ Դոնալդ Թրամփի վերադարձին Սպիտակ տուն, որից հետո Վաշինգտոնը գրեթե բոլոր երկրների նկատմամբ սահմանել է նոր ներմուծման մաքսատուրքեր։ Թեպետ ABP-ի հաշվետվություններում նշվում է պարտատոմսերի արժեքը, այլ ոչ թե դրանց քանակը, գործակալությունը ընդգծում է, որ այդ շրջանում ԱՄՆ գանձապետական պարտատոմսերի շուկայական գները հիմնականում կայուն են մնացել կամ աճել, ինչը կարող է վկայել հենց ներդրումային քաղաքականության փոփոխության մասին։

Նախօրեին Դոնալդ Թրամփը զգուշացրել էր եվրոպական երկրներին հնարավոր կոշտ պատասխան քայլերի մասին, եթե նրանք սկսեն հրաժարվել ամերիկյան պետական պարտատոմսերից։ Այդ հայտարարությունները հնչել էին Գրենլանդիայի շուրջ լարվածության ֆոնին։ Միևնույն ժամանակ Դանիայի AkademikerPension ֆոնդը հայտնել էր, որ մտադիր է ամբողջությամբ վաճառել ԱՄՆ գանձապետական պարտատոմսերի իր փաթեթը՝ մոտ 100 միլիոն դոլարի չափով, սակայն ԱՄՆ ֆինանսների նախարար Սքոթ Բեսենթը հայտարարել էր, որ այդ քայլը իրեն չի մտահոգում ներդրումների համեմատաբար փոքր ծավալի պատճառով, հաղորդում է Reuters-ը։