ՌԴ ԱԳՆ-ն անիմաստ է համարել G7 ձևաչափով Ռուսաստանի և Ուկրաինայի հանդիպումը

Ռուսաստանի և Ուկրաինայի միջև բանակցությունների անցկացումը «Մեծ յոթնյակի» (G7) երկրների հանդիպման շրջանակում ներկայիս պայմաններում իմաստ չունի, հայտարարել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան՝ պատասխանելով «Լենտա.ռու»-ի հարցին։ Նրա խոսքով՝ Մոսկվայի վերաբերմունքը G7 ձևաչափին վաղուց հայտնի է, և այն այլևս չի համապատասխանում ժամանակակից միջազգային իրողություններին։

Զախարովան ընդգծել է, որ «յոթնյակը» ի վիճակի չէ նպաստել ճգնաժամերի լուծմանը, քանի որ գլոբալ նշանակության քաղաքական որոշումները վաղուց ընդունվում են այլ հարթակներում։ Նրա խոսքով՝ աշխարհում տեղի ունեցող զարգացումները հստակ ցույց են տալիս, որ G7-ը կորցրել է իր ազդեցությունն ու դերակատարությունը։

ՌԴ ԱԳՆ ներկայացուցիչը նաև հիշեցրել է, որ G7-ի երկրների մեծ մասը վարում է բացահայտ թշնամական քաղաքականություն Ռուսաստանի նկատմամբ՝ շարունակելով համապարփակ աջակցություն ցուցաբերել Կիևին և նպաստել Ուկրաինայում ռազմական գործողությունների ձգձգմանը։ Զախարովայի խոսքով՝ այդ երկրներից չի նկատվում նաև պատժամիջոցային ճնշման նվազեցում, փոխարենը առկա է Մոսկվայի հետ ուղիղ հակադրության ուղղվածություն։ Ավելի վաղ հաղորդվել էր, որ Ֆրանսիայի նախագահ Էմանուել Մակրոնը առաջարկել էր Փարիզում կազմակերպել G7 հանդիպում Ռուսաստանի և Ուկրաինայի մասնակցությամբ։