Կենտրոնական բանկը չի կանխատեսում ռուբլու կայուն արժեզրկում

Ռուբլու կայուն արժեզրկումը ցածր ինֆլյացիայի պայմաններում անհնար է, հայտարարել է Ռուսաստանի Կենտրոնական բանկի փոխնախագահ Ալեքսեյ Զաբոտկինը՝ պատասխանելով կարգավորիչի Telegram-ալիքում հնչած հարցերին։ Նրա խոսքով՝ ԿԲ գործող դրամավարկային քաղաքականությունը, որը միտված է ցածր ինֆլյացիայի պահպանմանը, միաժամանակ նպաստում է նաև փոխարժեքի կայունությանը։

Զաբոտկինը չի բացառել, որ արտաքին շոկերը կարող են հանգեցնել ռուբլու կարճաժամկետ տատանումների, սակայն ընդգծել է, որ ներկայիս պայմաններում հնարավոր չէ շարունակական և ինքնապահպանվող արժեզրկում, որը կձգվի մեկ եռամսյակից մյուսը։ Նրա խոսքով՝ նման սցենարները չեն համադրվում երկրի մակրոտնտեսական ներկայիս իրավիճակի հետ։

ԿԲ փոխնախագահը հիշեցրել է, որ ռուբլու փոխարժեքը կշարժվի այն ուղեգծով, որը համապատասխանում է ցածր ինֆլյացիային։ Ավելի վաղ նա նշել էր, որ գների դանդաղ աճը հնարավորություն է տալիս ոչ միայն վերահսկել ինֆլյացիոն գործընթացները, այլև ապահովել ազգային արժույթի հարաբերական կայունությունը։