ԱՄԷ-ում հայտնել են Ուկրաինայի շուրջ բանակցությունների դրական մթնոլորտի մասին

Ուկրաինայի հակամարտության կարգավորման շուրջ Աբու Դաբիում կայացած բանակցությունները անցել են դրական և կառուցողական մթնոլորտում, հայտնում է Reuters-ը՝ հղում անելով Արաբական Միացյալ Էմիրությունների կառավարության ներկայացուցչին։ Նրա խոսքով՝ կողմերը պահպանել են աշխատանքային և կառուցողական մոտեցում։

Զրուցակիցը ընդգծել է, որ հանդիպումը նպաստել է երկխոսությանը, թեև քննարկված հարցերի մանրամասները չեն հրապարակվում։ Ավելի վաղ ՏԱՍՍ-ի աղբյուրը նշել էր, որ Ուկրաինայի շուրջ եռակողմ հանդիպումը չի անցել «առանց արդյունքների», և բանակցությունների շարունակությունը սպասվում է մոտ ապագայում։

Միաժամանակ Reuters-ի աղբյուրները հայտնել են, որ ռուսական պատվիրակությունը հանդիպումից հետո վերադարձել է հյուրանոց։ Իսկ Axios-ի լրագրող Բարակ Ռավիդը՝ հղում անելով իր աղբյուրներին, նշել է, որ բանակցությունների նոր փուլը կարող է կայանալ արդեն հաջորդ շաբաթ, ընդ որում Կիևի պատվիրակությունը ևս հանդիպումը գնահատել է որպես կառուցողական։