Կրեմլը բացատրել է Պուտինի և Ուիթքոֆի ուշ ժամին կայացած հանդիպումը

Ռուսաստանի նախագահի մամուլի քարտուղար Դմիտրի Պեսկովը Վլադիմիր Պուտինի և ԱՄՆ հատուկ բանագնաց Սթիվ Ուիթքոֆի ուշ ժամին կայացած հանդիպումը բացատրել է ամերիկյան կողմի շտապողականությամբ։ Այս մասին նա ասել է «Россия-1» հեռուստաալիքի լրագրող Պավել Զարուբինին տված հարցազրույցում, հաղորդում է «Коммерсантъ»-ը։

«Ամերիկացիները որպես միջնորդներ ժամանակի հետևից են վազում, նրանք շտապում են», — նշել է Պեսկովը։

Նա հավելել է, որ Պուտինը սովոր չէ ուշադրություն դարձնել օրվա ժամին, երբ խոսքը վերաբերում է լուրջ շփումներին։

Հանդիպումը Կրեմլում կայացել է հունվարի 22-ին և տևել մոտ չորս ժամ։ Ռուսաստանի նախագահի օգնական Յուրի Ուշակովի վկայությամբ, այն եղել է բովանդակալից։

Հաջորդ օրը Աբու Դաբիում մեկնարկել են անվտանգության հարցերով եռակողմ աշխատանքային խմբի բանակցությունները՝ Ռուսաստանի, ԱՄՆ-ի և Ուկրաինայի մասնակցությամբ։ Բանակցությունները տեղի են ունեցել հունվարի 23-ին և 24-ին։ Սթիվ Ուիթքոֆը հաստատել է, որ հաջորդ փուլը կկայանա հաջորդ շաբաթ։ Axios-ի զրուցակիցներից մեկը կարծում է, որ «մենք շատ մոտ ենք Ռուսաստանի նախագահ Վլադիմիր Պուտինի և Ուկրաինայի նախագահ Վլադիմիր Զելենսկու հանդիպմանը»: