Ոսկին հատեց 5,100 դոլարի շեմը՝ հասնելով պատմական առավելագույնի

Հունվարի 26 (Reuters) – Ոսկու գինը հասել է պատմական առավելագույնի՝ գերազանցելով 5,100 դոլարը մեկ ունցիայի դիմաց: Spot շուկայում ոսկին աճել է 2.2%-ով՝ հասնելով 5,089.78 դոլարի, մինչդեռ ավելի վաղ գրանցվել է բոլոր ժամանակների նոր ռեկորդ՝ 5,110.50 դոլար։ 2025 թվականին ոսկին արդեն թանկացել էր 64%-ով՝ գրանցելով ամենախոշոր տարեկան աճը 1979 թվականից ի վեր։

Թանկացման հիմնական պատճառներից են ԱՄՆ դրամավարկային քաղաքականության մեղմացումը, կենտրոնական բանկերի՝ հատկապես Չինաստանի շարունակական գնումները, ինչպես նաև բորսայական ֆոնդերում արձանագրված ռեկորդային ներհոսքերը։ Վերլուծաբանների խոսքով՝ վերջին աճը խթանվել է նաև ԱՄՆ վարչակազմի նկատմամբ վստահության ճգնաժամով և արտաքին քաղաքականության անկանխատեսելի քայլերով, որոնք մեծացրել են շուկաների լարվածությունն ու ռիսկերի ընկալումը։

Միևնույն ժամանակ, դոլարի թուլացումն ու ճապոնական իենի արժևորումը ոսկին ավելի մատչելի են դարձրել այլ արժույթներով ներդրողների համար։ Վերլուծաբանները կանխատեսում են, որ գլոբալ լարվածությունների և ուժեղ պահանջարկի պահպանման պայմաններում ոսկու գինը կարող է այս տարի բարձրանալ մինչև 5,500–6,000 դոլար, թեև հնարավոր են կարճաժամկետ ուղղումներ շահույթ ֆիքսող ներդրողների ակտիվության պատճառով։