Սահնակով սահելու ընթացքում մահացել է 12-ամյա երեխա

Մոսկվայում 12-ամյա տղան մահացել է ձմեռային խաղի ընթացքում ստացած ծանր վնասվածքների հետևանքով։ Դեպքի մասին հայտնել է Mash Telegram-ալիքը։ Ըստ հրապարակման՝ միջադեպը տեղի է ունեցել Կրասնոգորսկում։

Լրատվամիջոցի տվյալներով՝ երեխան սահել է վտանգավոր վայրում գտնվող սահնակուղով, որի վերջնամասը դուրս է եկել ավտոճանապարհ։ Տղան մեծ արագություն է հավաքել «վատռուշկայով», չի հասցրել խուսափել և հայտնվել է մեքենայի տակ։ Նրան տեղափոխել են հիվանդանոց, որտեղ երեխան ընկել է կոմայի մեջ և այդպես էլ գիտակցության չի եկել։

Mash-ի փոխանցմամբ՝ նույն շրջանում ևս առնվազն ինը երեխա տարբեր վնասվածքներ են ստացել՝ սահնակներով սահելու ժամանակ։ Ավելի վաղ նաև հաղորդվել էր, որ Բրյանսկում «վատռուշկաներով» սահող երկու դպրոցական ընկել են գետի սառույցի տակ, և, նախնական տվյալներով, նրանց փրկել չի հաջողվել։