Samsung-ը հաջորդ ամսից կսկսի HBM4 չիպերի արտադրությունը՝ Nvidia-ին մատակարարելու համար

Samsung Electronics-ը նախատեսում է հաջորդ ամսից սկսել նոր սերնդի բարձր թողունակությամբ հիշողության չիպերի՝ HBM4-ի արտադրությունը և դրանք մատակարարել ամերիկյան Nvidia ընկերությանը։ Այդ մասին հայտնում է Reuters-ը՝ հղում անելով հարցին ծանոթ աղբյուրի։ Նշվում է, որ սա կարևոր քայլ է Samsung-ի համար՝ մրցակցին՝ SK Hynix-ին, հետ չմնալու նպատակով, որը ներկայում Nvidia-ի առաջատար հիշողության հիմնական մատակարարն է։

Reuters-ի փոխանցմամբ՝ Samsung-ը վերջին շրջանում փորձում է արագացնել իր դիրքերի վերականգնումը HBM շուկայում, քանի որ մատակարարման ուշացումները նախորդ տարի բացասաբար էին ազդել ընկերության շահույթի և բաժնետոմսերի վրա։ Լուրը հրապարակվելուց հետո Samsung-ի բաժնետոմսերն աճել են 2,2 տոկոսով, մինչդեռ SK Hynix-ի արժեթղթերը նվազել են մոտ 2,9 տոկոսով։ Աղբյուրը չի հստակեցրել Nvidia-ին մատակարարվելիք չիպերի ծավալները, իսկ Samsung-ն ու Nvidia-ն պաշտոնական մեկնաբանություններից հրաժարվել են։

Միևնույն ժամանակ Korea Economic Daily-ն հաղորդել է, որ Samsung-ը հաջողությամբ անցել է HBM4 չիպերի որակավորման փորձարկումները Nvidia-ի և AMD-ի համար և արդեն հաջորդ ամսից կսկսի մատակարարումները։ Ակնկալվում է, որ ինչպես Samsung-ը, այնպես էլ SK Hynix-ը HBM4 պատվերների վերաբերյալ մանրամասներ կհայտնեն առաջիկա օրերին՝ չորրորդ եռամսյակի ֆինանսական արդյունքների հրապարակման ընթացքում։ Nvidia-ի ղեկավար Ջենսեն Հուանգը ավելի վաղ հայտարարել էր, որ ընկերության նոր սերնդի Vera Rubin հարթակը գտնվում է լիարժեք արտադրության փուլում և նախատեսված է աշխատել հենց HBM4 հիշողության չիպերով։