Chery-ն հետ է կանչում Jaecoo J7 և Tiggo 7 քրոսովերները՝ շարժիչի անսպասելի անջատման ռիսկի պատճառով

Չինական Chery ավտոարտադրողը հայտարարել է Jaecoo J7 և Tiggo 7 քրոսովերների հետկանչման արշավի մասին։ Պատճառը հնարավոր տեխնիկական թերությունն է էլեկտրալարերի համակարգում, որը որոշ դեպքերում կարող է հանգեցնել մեքենայի շարժիչի անսպասելի դադարեցման երթևեկության ընթացքում։ Այդ մասին հայտնում է «Ռոսիսսկայա գազետա»-ն։

Ըստ հրապարակման՝ Չինաստանի շուկայի կարգավորման պետական վարչությունը հաստատել է համապատասխան միջոցառումների ծրագիրը։ Արտադրողի տվյալներով՝ ավտոմեքենաների որոշ խմբաքանակում մոնտաժի ժամանակ կարող է սխալ թույլ տրված լինել՝ կապված ուժային հանգույցի էլեկտրոնային կառավարման բլոկին միացող լարերի ամրացման հետ։ Արդյունքում շահագործման ընթացքում լարերի մեկուսացումը կարող է վնասվել, առաջացնել կարճ միացում և շարժիչի կանգ։

Հետկանչման արշավը վերաբերում է Չինաստանի ներքին շուկայում վաճառված շուրջ 1,1 հազար ավտոմեքենայի՝ Chery Tansuo 06 (միջազգային շուկաներում՝ Jaecoo J7) և Tiggo 7 մոդելների, որոնք հավաքվել են 2025 թվականի ապրիլի 1-ից մինչև դեկտեմբերի 8-ը և հագեցած են 1.6 լիտրանոց տուրբոշարժիչով։ Ներառված են նաև Tiggo 7 Sport և Tiggo 7 Plus տարբերակները։ Բոլոր մեքենաների համար նախատեսված է անվճար ստուգում, իսկ անհրաժեշտության դեպքում՝ լարերի վերանորոգում կամ փոխարինում՝ Chery-ի հաշվին։