Uniper-ը պահանջում է «Գազպրոմից» 45 մլն եվրո՝ «Հյուսիսային հոսքի» հետ կապված մատակարարումների համար

Գերմանական Uniper էներգետիկ կոնցեռնի դուստր ընկերությունը՝ Lubmin-Brandov Gastransport GmbH (LBGT), հայց է ներկայացրել «Գազպրոմ Էքսպորտ»-ի դեմ Միջազգային առևտրային պալատի միջազգային արբիտրաժային դատարանում։ Այդ մասին հայտնում է «Ինտերֆաքս»-ը։ Հայցը վերաբերում է 2012 թվականի հունիսի 1-ին կնքված պայմանագրին՝ OPAL գազատարով գազի մատակարարումների վերաբերյալ, որը հանդիսանում էր «Հյուսիսային հոսք» գազատարի ցամաքային շարունակությունը։

LBGT-ն պահանջում է շուրջ 45 միլիոն եվրո փոխհատուցում՝ կապված 2022 թվականին մատակարարումների կտրուկ կրճատման հետ։ Այդ ժամանակ ընկերությունը ստիպված է եղել գազ գնել սփոթ շուկայում՝ փոխհատուցելու բացակայող ծավալները, այն պայմաններում, երբ Եվրոպայում գազի գինը գերազանցել էր 3 հազար դոլարը հազար խորանարդ մետրի դիմաց։ Նշվում է, որ LBGT-ն տնօրինում է OPAL գազատարի 20 տոկոսը։

Միևնույն ժամանակ Սանկտ Պետերբուրգի և Լենինգրադի մարզի արբիտրաժային դատարանը, «Գազպրոմ Էքսպորտ»-ի պահանջով, արգելել է LBGT-ին շարունակել գործի քննությունը Ռուսաստանի սահմաններից դուրս՝ նշելով, որ խախտման դեպքում կարող է կիրառվել համարժեք պատժամիջոց՝ 45 միլիոն եվրոյի չափով։ Ավելի վաղ Uniper-ի մեկ այլ ստորաբաժանում արդեն հաղթել էր «Գազպրոմ Էքսպորտ»-ի դեմ արբիտրաժային գործը՝ շուրջ 13 միլիարդ եվրոյի չափով պահանջով, ինչից հետո ընկերությունը Գերմանիայում ենթարկվել էր պետականացման։ 2023 թվականին ՌԴ նախագահ Վլադիմիր Պուտինը նաև Uniper-ի ռուսական «դուստր» ընկերության՝ Unipro-ի բաժնեմասը փոխանցել էր Ռոսիմուշչեստվոյի արտաքին կառավարմանը։