Դատապարտվել է գործ «դզելու» խոստում տված նախկին ոստիկան

Ռուսաստանի Կրասնոդարի երկրամասում դատարանը երեքուկես տարվա ազատազրկման է դատապարտել քրեական հետախուզության նախկին օպերլիազորին, որը գումարի դիմաց խոստացել էր «լուծել» ծանոթի քրեական գործի հարցը։ Այդ մասին «Լենտա.ռու»-ին հայտնել են տարածաշրջանի դատարանների միացյալ մամուլի ծառայությունից։

Դատարանը նախկին ոստիկանին մեղավոր է ճանաչել Քրեական օրենսգրքի 30-րդ և 159-րդ հոդվածներով («Խարդախության փորձ»)։ Դատապարտյալը հայտարարել է, որ հանցագործության է դիմել ֆինանսական պարտքերի պատճառով։ Պատժի կրումը սահմանվել է ընդհանուր ռեժիմի գաղութում։

Քննության վարկածով՝ ոստիկանն իմանալով, որ իր ծանոթը մեղադրվում է պաշտոնատար անձի նկատմամբ բռնություն կիրառելու հոդվածով, առաջարկել է 2,2 միլիոն ռուբլու դիմաց միջամտել և մեղմացնել պատասխանատվությունը։ Սակայն քաղաքացին այդ առաջարկի մասին հայտնել է իրավապահներին, ինչից հետո սեպտեմբերի 9-ին՝ 2025 թվականին, նախկին իրավապահը կեղծ գումարներ ստանալիս ձերբակալվել է ԱԴԾ աշխատակիցների կողմից։