«Հիշում եմ քո ձայնը». Փարիզում և Թուլուզում բարձրացվեց Արցախի լռեցված ձայնը

Փետրվարի սկզբին Փարիզի քաղաքապետարանի դիմաց կփակցվեն Բաքվում պահվող հայ գերիների լուսանկարները։ Այդ մասին Փարիզի քաղաքապետարանում տեղի ունեցած «Հիշում եմ քո ձայնը» փաստավավերագրական ֆիլմի ցուցադրության ժամանակ հայտարարել է Փարիզի փոխքաղաքապետ Արնո Նգաչան։

«Հուսով եմ՝ այդ օրը շատ մարդ կլինի մեր կողքին։ Այդ կերպ ևս մեկ անգամ կփորձենք լսելի դարձնել հայ գերիների ձայնը»,— ասել է նա՝ ընդգծելով, որ արցախցիների ողբերգությունը միջազգային օրակարգում հաճախ մնում է ստվերում։ «Հիշում եմ քո ձայնը»-ն 2023 թվականի սեպտեմբերին Արցախում տեղի ունեցած էթնիկ զտման մասին պատմող առաջին փաստավավերագրական ֆիլմն է։

«Voices of Hope» հիմնադրամի և ամերիկյան «All Prime Group» ընկերության համատեղ արտադրության ֆիլմը վեց բռնի տեղահանվածների պատմությունների միջոցով ներկայացնում է ավելի քան 120 հազար հայերի ճակատագիրը։ ԱՄՆ-ում և Բրազիլիայում ցուցադրվելուց հետո ֆիլմը ներկայացվել է նաև Ֆրանսիայում՝ Փարիզի քաղաքապետարանում, G2iA ասոցիացիայի նախաձեռնությամբ և քաղաքապետարանի աջակցությամբ։

«Դուք չունեք նավթ, չունեք գազ, և երևի հենց այդ պատճառով էլ Արցախում տեղի ունեցածը որոշների համար հետաքրքիր չէ։ Ցավոք, դա շատ տեսանելի է, երբ տեսնում ենք, որ այլ հակամարտությունների մասին խոսում են միշտ և ամենուր»,— նշել է Փարիզի փոխքաղաքապետը՝ հավելելով, որ արցախցիների ձայնը պետք է հնչի ամբողջ աշխարհում։ Ֆիլմի համահիմնադիր Արշակ Կարապետյանի խոսքով՝ «Հիշում եմ քո ձայնը»-ն փոքր ֆիլմ է, սակայն մեծ ուղերձ ունի․

«Ինչպես ասում են՝ հենց ավազահատիկներից մեկն է կոտրում ուղտի մեջքը։ Թող սա լինի այն հատիկներից մեկը, որը մի օր կկոտրի անարդարության ուղտի մեջքը»։

Նիկոլայ Մելիքյանի և Արայիկ Սարգսյանի ֆիլմը ցուցադրվել է նաև Թուլուզում՝ Թուլուզի հայկական ընկերակցության նախաձեռնությամբ։

Թուլուզ մետրոպոլի փոխնախագահ, քաղաքապետի տեղակալ Ժան-Կլոդ Դարդելեն ընդգծել է, որ Թուրքիան և Ադրբեջանը շարունակաբար ճնշում են Հայաստանին՝ սպասարկելով կոնկրետ քաղաքական շահեր։

«Լեռնային Ղարաբաղի 9-ամսյա շրջափակումից հետո Ադրբեջանը ներխուժեց հայկական տարածք, սպանեց խաղաղ բնակիչների, իսկ ավելի քան 100 հազար մարդու ստիպեց բռնել գաղթի ճանապարհը՝ միջազգային լռության պայմաններում»,— ասել է նա՝ հավելելով, որ ֆիլմը պետք է ցուցադրվի միջազգային հարթակներում։

Ֆրանսիայում Արցախի բռնի տեղահանման մասին պատմող ֆիլմի ցուցադրությունների շարքը եզրափակվել է Նիս քաղաքում։