Չինաստան – Բրիտանիա․ տնտեսական ռիսկեր և դիվանագիտական մարտահրավերներ

Մեծ Բրիտանիայի վարչապետ Քիր Սթարմերը չորեքշաբթի երեկոյան կմեկնի Պեկին՝ նպատակ ունենալով ամրապնդել քաղաքական և գործարար կապերը Պեկինի հետ այն պայմաններում, երբ Արևմտյան երկրների և Միացյալ Նահանգների հարաբերություններում նկատվում է աճող անկայունություն։ Սա բրիտանական առաջնորդի առաջին այցն է Չինաստան 2018 թվականից ի վեր։

Սթարմերը նշել է, որ Լոնդոնը չի կարող իրեն թույլ տալ անտեսել Չինաստանի ազդեցիկ տնտեսական ներուժը միջազգային շուկաներում, սակայն միաժամանակ պետք է զգոն մնա անվտանգության հնարավոր ռիսկերի նկատմամբ։ Վարչապետը Չինաստան կմեկնի ավելի քան 50 բրիտանացի գործարարների պատվիրակության ուղեկցությամբ և ծրագրում է հանդիպումներ ունենալ Չինաստանի նախագահ Սի Ծինփինի և վարչապետ Լի Ցյանի հետ, ինչպես նաև այցելել Շանհայ՝ բանակցություններ վարելու տեղական բիզնես շրջանակների հետ, հայտնում է reuters- ը: 

Այցը կարող է կարևոր շրջադարձ դառնալ Մեծ Բրիտանիա–Չինաստան հարաբերություններում՝ երկարատև լարվածությունից հետո, որը պայմանավորված էր Հոնկոնգում քաղաքական ազատությունների սահմանափակմամբ, Ուկրաինայի պատերազմի հարցում Ռուսաստանի նկատմամբ Չինաստանի դիրքորոշմամբ և Պեկինի հասցեին հնչած լրտեսության մեղադրանքներով, հայտնում է reuters - ը: Միևնույն ժամանակ այցը տեղի է ունենում ԱՄՆ նախագահ Դոնալդ Թրամփի հետ առաջացած տարաձայնությունների ֆոնին, ինչի պայմաններում Լոնդոնը փորձում է պահպանել հավասարակշռություն՝ չվնասելով իր ռազմավարական կապերը Վաշինգտոնի հետ։