4 ոչ աշխատանքային օր կլինի

2026 թվականի մայիսի 4-ը կհայտարարվի ոչ աշխատանքային օր։ Այդ որոշումը ընդունվել է այսօր՝ հունվարի 29-ին, կայացած ՀՀ կառավարության նիստում՝ «Աշխատանքային օրը տեղափոխելու մասին» նախագծի շրջանակում։

Մայիսի 4-ի աշխատանքային օրը կփոխանցվի 2026 թվականի ապրիլի 18-ին, որը շաբաթ  է։ Այսպիսով, ապրիլի 18-ը կհամարվի աշխատանքային օր՝ փոխարինելով մայիսի 4-ին։

Որոշումը պայմանավորված է այն հանգամանքով, որ Հայաստանում մայիսի 3-ին և 4-ին անցկացվելու է Եվրոպական քաղաքական համայնքի (ԵՔՀ) 8-րդ գագաթնաժողովը, որին կմասնակցեն շուրջ 50 բարձր մակարդակի պատվիրակություններ՝ պետությունների և միջազգային կառույցների ղեկավարների մասնակցությամբ։

Այդ օրերին Երևան քաղաքի կենտրոնական հատվածում սպասվող մեծածավալ երթևեկությունը պատշաճ կազմակերպելու նպատակով էլ ընդունվել է տվյալ որոշումը։

Արդյունքում մայիսի 1-ը, 2-ը, 3-ը և 4-ը կլինեն ոչ աշխատանքային օրեր, իսկ ապրիլի 18-ը՝ աշխատանքային։