Թրամփի որդին օգնել է բացահայտել Լոնդոնում կատարված հարձակումը

Լոնդոնում դատարանը Ռուսաստանի քաղաքացի Մատվեյ Ռումյանցևին մեղավոր է ճանաչել կնոջ նկատմամբ հարձակման մեջ, իսկ հետաքննությանը նպաստել է ԱՄՆ նախագահ Դոնալդ Թրամփի կրտսեր որդին՝ Բարոնը, որը տեսազանգի ժամանակ ականատես է եղել հարձակմանը։ Այս մասին հաղորդում է BBC-ն։

Ռումյանցևը, որը բնակվում է Լոնդոնի Քեների Ուորֆ թաղամասում, մեղավոր է ճանաչվել նաև արդարադատությունը խոչընդոտելու փորձի մեջ. բանտում գտնվելու ընթացքում նա տուժածին նամակ է ուղարկել՝ խնդրելով հետ վերցնել իր բողոքը: Դատարանը նրան արդարացրել էր երկու մեղադրանքներից՝ բռնաբարության և դիտավորյալ խեղդամահ անելու համար: Ռումյանցևը հերքել է բոլոր մեղադրանքները։

Լսումների ժամանակ պարզվել է, որ 2025 թվականի հունվարի 18-ի գիշերը 19-ամյա Բարոն Թրամփը Միացյալ Նահանգներից կապ է հաստատել Լոնդոնի ոստիկանության հետ և հայտնել, որ տեսազանգի ժամանակ ականատես է եղել իր ընկերուհու վրա Լոնդոնում տեղի ունեցած հարձակմանը։

«Ես զանգահարում եմ Միացյալ Նահանգներից, մի աղջիկ հենց նոր զանգահարեց ինձ, նրան ծեծում են», - ասել է նա օպերատորին: Երբ հարցրել են, թե որտեղից է ճանաչում կնոջը, Թրամփը պատասխանել է. «Չեմ կարծում, որ այդ մանրամասները կարևոր են, նրան ծեծում են: Բայց լավ, ես նրա հետ ծանոթացել եմ սոցիալական ցանցերում»։

Տուժածը հետագայում զանգահարել է ոստիկանություն, և Ռումյանցևը ձերբակալվել է հունվարի 18-ի առավոտյան: Կնոջ անունը չի հրապարակվել։