«Շու՛նչդ տուր, հոգի՛դ տուր, բայց Հայրենիքդ մի՛ տուր թշնամուդ»․ երբ երիտասարդները խոսում են Հայրենիքի մասին․․․

Միջոցառման ընթացքում ներկայացվեցին 90-ականների, Ապրիլյան քառօրյայի և 44-օրյա պատերազմի ընթացքում իրենց կյանքը զոհաբերած քաջ մարտիկների սխրանքները։

 

 Մասնաճյուղի քոլեջի ուսանողները՝ Հայոց լեզվի դասախոս Արև Խաչատրյանի ղեկավարությամբ, հանդես եկան տպավորիչ հեղինակային ելույթներով, որոնք հագեցած էին հայրենասիրությամբ և անկոտրում ոգով։ Խորհրդանշական էր նաև քոլեջի 1-ին կուրսի ուսանողուհի Ռայա Վարդազարյանի վստահ կատարումը դհոլի վրա, որը գերեց հանդիսատեսին։

 

«Մեր ուսանողները, որոնք իրենց մասնակցությունն էին ապահովում, խոստացան մնալ հավատարիմ՝ երբեք ու երբեք չլքել հայրենիքը և մնալ հայրենիքում ու պահպանել այն։ Հայրենասիրական թեմային անդրադարձ կատարելով՝ չենք մոռանում բոլոր նրանց, ովքեր հանուն հայրենիքի իրենց կյանքը չխնայեցին և ընկան հերոսի մահով՝ անմահանալով։ Այսօրվա մեր միջոցառումը ևս փաստում է այն հանգամանքը, որ մեր ապագա սերնդի ներկայացուցիչները՝ բուռն պաթոսով մասնակցելով միջոցառմանը, ապացուցեցին, որ հայի ոգին անկոտրում է», – նշում է Արև Խաչատրյանը։

 

Մասնաճյուղի տնօրեն, պ․գ․թ․ Թամարա Վարդանյանն իր հերթին ընդգծեց նման նախաձեռնությունների կարևորությունը մեր երիտասարդության հայրենասիրական ոգու պահպանման գործում։ Տնօրենի խոսքով՝ մենք այնքան ուժեղ պատմական հիշողության կրող ենք, որ այն անհնար է ջնջել։