ԱՄՆ ուժերը մեծացնում են ռազմական ներկայությունը՝ Իրանի շուրջ հնարավոր գործողությունների ֆոնին

Միացյալ Նահանգները շարունակում է ամրապնդել իր ռազմական ներկայությունը Մերձավոր Արևելքում՝ Իրանի շուրջ աճող լարվածության պայմաններում։ Վերջին օրերին նկատվում է ամերիկյան ռազմաօդային ուժերի և տրանսպորտային միջոցների ակտիվ տեղաշարժ դեպի Եվրոպայի և Մերձավոր Արևելքի ռազմավարական բազաներ, ինչը վկայում է հնարավոր ռազմական կամ կանխարգելիչ գործողությունների նախապատրաստման մասին, տեղեկանում ենք բաց աղբյուրներից ստացված տվյալներից  ։

Տեղեկությունների համաձայն՝ իրականացվում են ինչպես մարտական, այնպես էլ աջակցող և լոգիստիկ նշանակության թռիչքներ, որոնց նպատակն է ապահովել արագ արձագանքման կարողություն, ուժերի տեղափոխում և տարածաշրջանում գործող ամերիկյան ստորաբաժանումների ամրապնդում։ Միաժամանակ ուժեղացվում են օդային աջակցման և պաշտպանության հնարավորությունները՝ ընդգրկելով նաև որոնում-փրկարարական և հատուկ առաքելությունների կարողություններ։

Այս գործընթացները տեղի են ունենում ԱՄՆ–Իրան հարաբերությունների սրման, ինչպես նաև Վաշինգտոնի կողմից Թեհրանի նկատմամբ կոշտ հռետորաբանության ֆոնին։ Միջազգային վերլուծաբանների կարծիքով՝ ԱՄՆ-ի քայլերը միաժամանակ ուղերձ են թե՛ Իրանին, թե՛ տարածաշրջանային դաշնակիցներին, որ Վաշինգտոնը պատրաստ է արագ և լայնամասշտաբ արձագանքի ցանկացած սրացման դեպքում։