Ուղիղ կրակի զորավարժություններ Հորմուզում՝ ԱՄՆ–Իրան լարվածության ֆոնին

Իրանը հայտարարել է Հորմուզի նեղուցում ուղիղ կրակի ծովային զորավարժությունների անցկացման մասին՝ ԱՄՆ-ի հետ լարվածության աճի ֆոնին, հայտնում է ՝ AL-JAZEERA լրատվական կայքը՝  հղում կատարելով իրանական պետական Press TV-ին։ Զորավարժությունները նախատեսվում են փետրվարի 1–2-ին և իրականացվելու են ռազմավարական կարևոր նշանակություն ունեցող ջրերում, որտեղ  տեղակայված են նաև ԱՄՆ ռազմածովային ուժերը։

ԱՄՆ Կենտրոնական հրամանատարությունը (CENTCOM) հայտարարել է, որ Վաշինգտոնը չի հանդուրժի «ոչ անվտանգ գործողություններ» Իրանի կողմից՝ հատկապես ԱՄՆ նավերի և անձնակազմի նկատմամբ։ ԱՄՆ կողմը ընդգծել է, որ ցանկացած վտանգավոր մոտեցում, անհստակ կամ զինված մանևր կարող է հանգեցնել լուրջ հետևանքների։

Հորմուզի նեղուցը համարվում է համաշխարհային էներգետիկ փոխադրումների առանցքային ուղի, որով անցնում է աշխարհի նավթային բեռների մոտ 20 տոկոսը։ Տարածքում ռազմական ակտիվության աճը մտահոգություն է առաջացնում միջազգային նավագնացության և էներգետիկ շուկաների կայունության հարցում՝ ԱՄՆ–Իրան հարաբերությունների շարունակվող լարվածության պայմաններում։