«Ֆուլ Հաուս»-ը վերադարձել է՝ այս անգամ մեծ էկրանին

Յոթ տարի դադարից հետո սիրված «Ֆուլ Հաուս»-ը վերադարձել է՝ այս անգամ մեծ էկրանին։ «Ֆուլ Հաուս. Վայրէջք» ֆիլմում ծանոթ կերպարները հայտնվում են ամբողջովին նոր պատմության մեջ, և հանդիսատեսը կրկին հնարավորություն ունի վայելելու սիրելի հերոսների նոր արկածները։ Ֆիլմը մեծ էկրաններին է արդեն հունվարի 29-ից։

Պրեմիերայից առաջ դերասանական կազմն ու ստեղծագործական թիմը կիսվեցին իրենց հույզերով ու սպասումներով։ Սցենարիստ և դերասան Գրիգոր Դանիելյանը նշեց, որ սիթքոմի շարունակության մասին հարցը այս տարիների ընթացքում անդադար տրվել է իրենց և երջապես այդ երկար սպասված պահը իրականություն դարձավ՝ պատմությունը շարունակելու որոշումով, այս անգամ ոչ թե սերիալով, այլ լիամետրաժ ֆիլմի միջոցով։

Նոր ֆիլմը չի սահմանափակվում միայն կատակերգությամբ․ ստեղծագործական թիմը ձգտել է ստեղծել բազմաշերտ պատմություն, որտեղ առկա են նաև դրամատիկ, արկածային ու լարված սյուժետային պահեր։ Պրոդյուսեր Արմեն Պետրոսյանը ընդգծեց, որ ամենաբարդ փուլը տարիներ անց թիմը կրկին մեկտեղելն էր․ տարբեր երկրներում գտնվող դերասաններն ու ստեղծագործական անձնակազմը միավորվեցին մեկ ընդհանուր նպատակի շուրջ՝ կյանքի կոչելու երկար սպասված նախագիծը։ Ֆիլմը նախատեսվում է ցուցադրվել նաև արտերկրում՝ Եվրոպայում, ԱՄՆ-ում, Ռուսաստանում և Կանադայում, հասնելով սփյուռքի տարբեր համայնքներին։

Դերասանների խոսքով՝ պրեմիերայի օրը դարձել է տարիներով պահպանված զգացմունքների արտահայտություն։ Նրանք ընդգծում են, որ «Ֆուլ Հաուս»-ը երբեք չի հեռացել իրենց կյանքից, իսկ այս ֆիլմը հանդիսատեսի համար միաժամանակ վերադարձ է ու նոր սկիզբ։