Ճապոնացի բժիշկը ստեղծել է դեղամիջոց, որը կարող է երկարացնել կատուների կյանքը

Ճապոնիայում մշակվել է քրոնիկ երիկամային հիվանդություն ունեցող կատուների կյանքը երկարացնելու ունակ դեղամիջոց, հաղորդում է Mothership-ը։

Ճապոնացի գիտնական Տորու Միյազակին մշակել է էքսպերիմենտալ դեղամիջոց, որը կարող է զգալիորեն երկարացնել կատուների կյանքը՝ կանխելով քրոնիկ երիկամային հիվանդության զարգացումը, որը տնային կատուների մոտ ամենատարածված և վտանգավոր հիվանդություններից մեկն է։

Մասնագետի խոսքով՝ հիվանդությունը պայմանավորված է կատուների իմունային համակարգի առանձնահատկությամբ։ Նա բացատրել է, որ կատուների մոտ չի ակտիվանում AIM սպիտակուցը, որը կարևոր դեր է խաղում երիկամներից մնացուկների հեռացման գործում։

Այս սպիտակուցի անակտիվության պատճառով մնացուկները կուտակվում են երիկամներում, ինչը, ի վերջո, հանգեցնում է քրոնիկ երիկամային հիվանդության և երիկամային անբավարարության։ 

Իր հետազոտության ընթացքում Միյազակին հայտնաբերել է, որ կատուներին AIM տալու միջոցով կարող է վերականգնել երիկամների՝ վտանգավոր նյութերից մաքրվելու ունակությունը։

Այս հայտնագործության հիման վրա գիտնականը մշակել է նոր դեղամիջոց, որը կատուներին մատակարարում է անհրաժեշտ սպիտակուց՝ այդպիսով դանդաղեցնելով կամ կանգնեցնելով հիվանդության զարգացումը։ Թեստավորման տվյալների համաձայն՝ երիկամների ծանր հիվանդություն ունեցող կատուների մոտ 85%-ը գոյատևել է բուժումից հետո։