Ղրղզստանում ցանկանում են օրենսդրորեն արգելել սեռափոխությունը և նույնասեռ ամուսնությունները

Ղրղզստանում նախատեսվում է օրենսդրորեն արգելել փաստաթղթերում սեռի փոփոխությունը և նմանատիպ վիրահատությունների իրականացումը: Պատգամավոր Մարլեն Մամատալիևի հեղինակած համապատասխան օրինագիծը տեղադրվել է հանրապետության խորհրդարանի կայքում՝ հանրային քննարկումների բաժնում:

Փաստաթղթում պնդվում է, որ ներկայումս Ղրղզստանի օրենսդրության մեջ առկա է իրավական բաց, ինչը նախադրյալներ է ստեղծում բժշկական տեղեկանքների հիման վրա քաղաքացիական կացության ակտերում և որպես հետևանք՝ քաղաքացիների անձնագրերում սեռի վերաբերյալ գրառումը փոխելու համար:

Նախաձեռնողն առաջարկում է օրենսդրության մեջ կատարել փոփոխություններ, որոնք սահմանում են, որ ֆիզիկական անձի սեռը որոշվում է բացառապես ծննդյան պահին արձանագրված կենսաբանական հատկանիշների հիման վրա: Ըստ օրինագծի՝ փաստաթղթերում սեռի փոփոխությունը և համապատասխան բժշկական վիրահատությունների իրականացումը պետք է արգելվեն:

Բացի այդ, փաստաթուղթը նախատեսում է նույնասեռ ամուսնությունների արգելք և ամրագրում է, որ երեխայի մայր կարող է ճանաչվել միայն կենսաբանական կինը, իսկ հայր՝ կենսաբանական տղամարդը: Առանձին կետով նախատեսվում է փոփոխություններ մտցնել ոչ ավանդական հարաբերությունների քարոզչությանը վերաբերող օրենսդրության մեջ: