13-ամյա տղան չորս ժամ լողացել է ծովում՝ մորը, քրոջը և եղբորը փրկելու համար

Ավստրալիացի դեռահասը փոթորկի ժամանակ չորս կիլոմետր լողացել է ծովում ՝ իր ընտանիքին փրկելու համար, հաղորդում է BBC-ն։

Դեպքը տեղի է ունեցել ուրբաթ՝ հունվարի 30-ին, երբ 13-ամյա Օսթին Ապելբին, նրա մայրը՝ Ջոան Ապելբին, նրա 12-ամյա եղբայրը և 8–ամյա քույրը մակույկավարությամբ էին զբաղվում Ջեոգրաֆի ծոցում, որը գտնվում է Պերտից 200 կիլոմետր հարավ։

Հանկարծակի փոթորիկ է սկսվել, և ընտանիքը հեռացել է ափից։ Տղան փորձել է մակույկով վերադառնալ ափ՝ օգնություն խնդրելու, բայց նրա նավակը արագորեն լցվել է ջրով՝ ստիպելով նրան լողալով մոտենալ ափին։

«Ես պարզապես անընդհատ կրկնում էի. «Ո՛չ այսօր, ո՛չ այսօր, ո՛չ այսօր։ Ես պետք է շարունակեմ առաջ գնալ», - խոստովանել է Օսթինը։

Նա երկու ժամ լողացել է փրկարարական բաճկոնով, ապա ևս երկու ժամ՝ առանց դրա, հասել լողափ և 2 կմ վազել հեռախոսի ետևից։

Ժամը 18:00-ին սկսվել են որոնողական-փրկարարական աշխատանքները, որին մասնակցել են ջրային պարեկները, կամավորները և ուղղաթիռ: Երեկոյան 20:30-ին կինը և երեխաները գտնվել են ափից 14 կմ հեռավորության վրա՝ նավակում, և փրկվել։