Տղամարդը փրկել է սիրելիին իր կյանքի գնով

Իտալիայում 30-ամյա տղամարդն իրեն մեքենայի տակ է նետել՝ փրկելով իր ընկերուհուն սեփական կյանքի գնով։

Need To Know-ի հաղորդմամբ՝ դեպքը տեղի է ունեցել հունվարի 24-ին Սիցիլիայի Ֆավինյանա քաղաքում։ Այդ երեկոյան Մանուել Պիացան և Աննալիզա Տարտամելան դուրս են եկել ռեստորանից և կայանատեղիով քայլում էին դեպի իրենց մեքենան։ Այդ պահին Պիացան տեսել է արագորեն իրենց մոտեցող մեկ այլ մեքենա։

Պիացան կարողացել է իր մարմնով ծածկել Տարտամելային և մեղմել հարվածը։ Երկուսն էլ վիրավորվել են, բայց Պիացան ստացել է ծանր վնասվածքներ և ընկել կոմայի մեջ։ Նրան սկզբում տեղափոխել են Տրապանիի հիվանդանոց, ապա՝ Պալերմոյի բժշկական կենտրոն։ Բժիշկները չորս օր պայքարել են իտալացու կյանքը փրկելու համար, բայց՝ ապարդյուն․ նա մահացել է։

Հայտնի է, որ Պիացան ապրում էր Միլանի մոտակայքում և կահույք էր պատրաստում։ Նա Սիցիլիա էր եկել ընկերուհուն այցելելու։ Ոստիկանությունը դեռևս չի հրապարակել վթարի համար պատասխանատու անձի ինքնությունը։ Տարտամելան դեռ հիվանդանոցում է. նրա կյանքին վտանգ չի սպառնում։