ԱՀԿ փորձագետները քաղցկեղի բոլոր դեպքերի երեք հիմնական պատճառ են բացահայտել

Աշխարհում քաղցկեղի տասը դեպքերից գրեթե չորսը կարելի է կանխարգելել՝ վերացնելով հիմնական ռիսկի գործոնները՝ ծխելը, ալկոհոլի օգտագործումը և քաղցկեղի հետ կապված վարակները: Այս եզրակացությանն են հանգել Առողջապահության համաշխարհային կազմակերպության մասնագետները: Ուսումնասիրության արդյունքները հրապարակվել են Nature Medicine ամսագրում:

Վերլուծության համաձայն՝ 2022 թվականին գրանցված քաղցկեղի բոլոր նոր դեպքերի 38%-ը՝ մոտավորապես 7,1 միլիոնը, պայմանավորված են եղել կանխարգելելի պատճառներով: Այս եզրակացությանը հանգել է գիտնականների միջազգային խումբ, որի մեջ են եղել ԱՀԿ-ի Քաղցկեղի հետազոտությունների միջազգային գործակալության մասնագետները: Հետազոտողները գնահատել են քաղցկեղի զարգացման հավանականությունը մեծացնող 30 ռիսկի գործոնների ազդեցությունը:

Առաջատար ռիսկի գործոնը ծխախոտն է. ծխելը կազմում է քաղցկեղի բոլոր նոր դեպքերի 15%-ը: Երկրորդ տեղում են վարակները (10%), իսկ երրորդում՝ ալկոհոլի օգտագործումը (3%): Այլ նշանակալի գործոններից են մարմնի ավելորդ քաշը, ֆիզիկական անգործությունը, ուլտրամանուշակագույն ճառագայթման ազդեցությունը և աշխատավայրում վտանգավոր նյութերի ազդեցությունը: