ԱՄՆ-ում AI-ի տարածման ֆոնին աճել է խմբագիրների ու հեղինակների պահանջարկը

ԱՄՆ-ում աճել է խմբագիրների, գրողների և հաղորդակցության ոլորտի մասնագետների պահանջարկը՝ արհեստական բանականության միջոցով գեներացված ցածրորակ բովանդակության տարածման ֆոնին։ Այդ մասին հայտնում է Business Insider-ը՝ նշելով, որ շուկան կրկին սկսել է գնահատել որակյալ, վստահելի և մրցունակ տեքստեր ստեղծող մասնագետներին։

Հրապարակման համաձայն՝ AI-ով գեներացված նյութերի ծավալի աճը հանգեցրել է նրան, որ խոշոր ընկերությունները ստիպված են ներդրումներ անել մարդկային գործոնում։ Օրինակ՝ Microsoft-ը պատրաստ է տեխնոլոգիական հաղորդակցության ոլորտի ղեկավարի համար վճարել տարեկան մինչև 775 հազար դոլար՝ որակյալ հաղորդակցության և բովանդակության ապահովման նպատակով։

Business Insider-ի աղբյուրները նշում են, որ համացանցում «այնքան շատ անպիտան տեքստ կա», որ գործատուները կրկին պատրաստ են բարձր գնահատել իսկական մասնագետների աշխատանքը։ Միաժամանակ ԱՄՆ Դաշնային պահուստային համակարգի ղեկավար Ջերոմ Փաուելը նախկինում զգուշացրել էր, որ ԱԲ-ի զարգացումը կարող է կրճատել աշխատանքի հնարավորությունները շրջանավարտների համար, սակայն գործատուների մի մասը, չափից ավելի կրճատումներից հետո, արդեն սկսել է վերադարձնել աշխատակիցներին՝ գիտակցելով մարդկային փորձի արժեքը։