Մասնագետները նշել են համակարգչի օպտիմալ օպերատիվ հիշողության ծավալը 2026-ին

2026 թվականին համակարգչի արդյունավետ աշխատանքի համար օպերատիվ հիշողության անհրաժեշտ ծավալը կախված է օգտագործվող օպերացիոն համակարգից և կատարվող առաջադրանքներից։ Այդ մասին գրում է ZDNet-ը՝ նշելով, որ Windows 11-ով աշխատող համակարգիչների համար նվազագույն պահանջը 16 գիգաբայթ օպերատիվ հիշողությունն է, ինչը ներկայումս ունի շուկայում ներկայացված նոթբուքների մեծ մասը։

Apple համակարգիչների դեպքում իրավիճակը մի փոքր տարբեր է։ Քանի որ ընկերության սարքերը օպտիմիզացված են առօրյա օգտագործման համար, որոշ մոդելների համար բավարար է նաև 8 գիգաբայթ հիշողությունը։ Սակայն ZDNet-ը նշում է, որ վերջին շրջանում Apple-ը սկսել է իր Mac համակարգիչները համալրել առնվազն 16 գիգաբայթ օպերատիվ հիշողությամբ։

Արևմտյան շուկաներում տարածված ChromeOS օպերացիոն համակարգի համար նույնպես բավարար է 8 գիգաբայթ օպերատիվ հիշողությունը՝ ինտերնետային և գրասենյակային աշխատանքների համար։ Մասնագետները ընդգծում են, որ հիշողության ավելացումը, որպես կանոն, բարելավում է համակարգչի աշխատանքը, սակայն դրա ավելցուկը կարող է զգալիորեն բարձրացնել սարքի արժեքը։