Ինժեները բացահայտել է ռուսական ուժերի կողմից խոցված հազվագյուտ դրոնի առանձնահատկությունները

Ռուսական բանակի «Հյուսիս» զորախմբավորման կողմից խոցված FDG33 VTOL անօդաչու թռչող սարքը պատկանում է նոր սերնդի դրոններին և ունի ուղղահայաց թռիչքի ու վայրէջքի հնարավորություն։ Այդ մասին aif.ru-ին հայտնել է անօդաչու ավիացիայի ուսումնական կենտրոնի հիմնադիր, Ռուսաստանի ինժեներական ակադեմիայի ակադեմիկոս Մաքսիմ Կոնդրատևը։

Նրա խոսքով՝ VTOL (Vertical Take Off and Landing) տեխնոլոգիան թույլ է տալիս դրոնին վեր բարձրանալ և վայրէջք կատարել ուղղահայաց՝ շրջանցելով ավանդական կատապուլտային մեկնարկն ու պարաշյուտային վայրէջքը։ Կոնդրատևը նշել է, որ ավիացիոն միջադեպերի մինչև 90 տոկոսը տեղի է ունենում հենց թռիչքի և վայրէջքի փուլերում, ինչի նվազեցման համար ինժեներները համադրել են քառակոպտերի և ինքնաթիռի կառուցվածքները՝ ստեղծելով հիբրիդային լուծում։

Միաժամանակ փորձագետը ընդգծել է, որ FDG33-ը չինական արտադրության հետախուզական դրոն է և առանձնապես բարձր մարտավարատեխնիկական բնութագրեր չունի՝ բացի ուղղահայաց թռիչքի հնարավորությունից։ Նրա օգտակար բեռնվածքը շատ փոքր է՝ մինչև երեք կիլոգրամ, ինչի պատճառով սարքը կիրառվում է հիմնականում դիտարկման նպատակներով։ Ավելի վաղ հաղորդվել էր, որ փետրվարի 4-ին ռուսական սահմանամերձ շրջանում «Հյուսիս» զորախմբավորման ուժերը խոցել էին Ուկրաինայի զինված ուժերի օգտագործած այդ հազվագյուտ անօդաչուն։