Անդրեյ Մակարևիչի անունը հայտնվել է Էփշտեյնի գործի նյութերում

Ռուսական ռոք խմբի Մաշինա Վրեմենի  առաջնորդ Անդրեյ Մակարևիչի անունը ներառված է սկանդալային ֆինանսիստ Ջեֆրի Էփշտեյնի գործով հրապարակված նյութերում։ Այդ մասին հայտնում է ՌԻԱ Նովոստի-ն՝ հղում անելով ԱՄՆ արդարադատության նախարարության կողմից հրապարակված փաստաթղթերին։

Ըստ հրապարակման՝ Մակարևիչը հիշատակվում է 2012 թվականի մայիսին Էփշտեյնի ստացած մամուլի դիտարկման մեջ՝ կապված 2010-ականների սկզբին Ռուսաստանի զանգվածային բողոքի ակցիաներին նրա մասնակցության հետ։ Նույն փաստաթղթերում հիշատակվում է նաև գրող Բորիս Ակունինը (Գրիգորի Չխարտիշվիլի)։ Նշվում է, որ մամուլի նյութերում Մակարևիչը ներկայացված է որպես Պուշկինի հրապարակից մինչև Մաքուր լճեր կազմակերպված երթերից մեկի առաջնորդ։

Միաժամանակ ընդգծվում է, որ խոսքը չի վերաբերում որևէ իրավական մեղադրանքի կամ կապի հաստատմանը Էփշտեյնի հանցավոր գործունեության հետ․ երաժշտի անունը հայտնվել է բացառապես մամուլի նյութերի համատեքստում, որոնք հավաքվել էին ֆինանսիստի համար։ Ավելի վաղ հայտնի էր դարձել, որ Էփշտեյնի գործի նյութերում հիշատակվել էր նաև ռուսական «Иванушки International» խմբի անդամներից մեկը։