Ռուսաստանը դարձել է Չինաստան ներկրվող հնդկահավի հիմնական մատակարարը

2025 թվականին Չինաստանը ներմուծել է 14,8 հազար տոննա հնդկահավ՝ ընդհանուր առմամբ 40,5 միլիոն դոլարի չափով։ Այդ տվյալները հրապարակել է Չինաստանի գլխավոր մաքսային վարչությունը՝ վկայակոչելով պաշտոնական վիճակագրությունը։ Նշվում է, որ ներկրման շուկան փաստացի կենտրոնացել է մեկ հիմնական մատակարարի շուրջ։

Ֆիզիկական ծավալով ներմուծման շուրջ 90 տոկոսը բաժին է ընկել Ռուսաստանին։ Խոսքը 13,2 հազար տոննա հնդկահավի մասին է, որի դիմաց չինական կողմը վճարել է 35,3 միլիոն դոլար։ Այս ցուցանիշով Ռուսաստանը դարձել է Չինաստանի հնդկահավի խոշորագույն մատակարարը՝ զգալիորեն գերազանցելով մյուս երկրներին։

Երկրորդ հորիզոնականում հայտնվել է Չիլին, որը 2025 թվականին Չինաստան է արտահանել 1,5 հազար տոննա հնդկահավ՝ 5,2 միլիոն դոլարի արժեքով։ «Ագրոէքսպորտ» կենտրոնի տվյալներով՝ 2025 թվականի հունվարից հոկտեմբեր Ռուսաստանի թռչնամսի արտահանումը Չինաստան աճել է 15 տոկոսով՝ հասնելով 134 հազար տոննայի, իսկ արժեքային արտահայտությամբ՝ 10 տոկոսով՝ մինչև 381 միլիոն դոլար։