Ռուսաստանը պահանջում է Դոնբասը ճանաչել որպես իր մաս՝ խաղաղ համաձայնագրի շրջանակում

Ռուսաստանը նախատեսում է, որ Ուկրաինայի շուրջ հնարավոր լայնածավալ համաձայնագրի առանցքային պայմաններից մեկը լինի Դոնբասը որպես Ռուսաստանի մաս ճանաչելը բոլոր երկրների կողմից։ Այդ մասին հայտնում է ՏԱՍՍ-ը՝ վկայակոչելով Աբու Դաբիում ընթացող բանակցություններին մոտ կանգնած արևմտյան աղբյուրի։

Աղբյուրի փոխանցմամբ՝ Մոսկվայի համար Դոնբասի միջազգային ճանաչումը ունի սկզբունքային նշանակություն և դիտարկվում է որպես ապագա պայմանագրի կարևոր բաղադրիչ։ Նշվում է, որ ռուսական կողմը այդ հարցը դիտում է ոչ թե որպես երկրորդական, այլ հիմնարար պահանջ։

Փետրվարի 5-ին  Աբու Դաբիում մեկնարկել է Ռուսաստանի, ԱՄՆ-ի և Ուկրաինայի պատվիրակությունների միջև բանակցությունների երկրորդ օրը, որի ընթացքում քննարկվում են տնտեսական և տարածքային հարցեր, ինչպես նաև հրադադարի մեխանիզմը։ Ավելի վաղ Ռուսաստանի նախագահի ներդրումային և տնտեսական համագործակցության հարցերով հատուկ ներկայացուցիչ Կիրիլ Դմիտրիևը նշել էր, որ Ուկրաինայի շուրջ բանակցություններին Եվրոպայի միջամտելու փորձերը կարող են վկայել խաղաղ գործընթացում առաջընթացի մասին։