Google-ը առաջ է անցնում OpenAI-ից՝ արագ աճող արհեստական բանականության շնորհիվ

Alphabet ընկերությունը, որը հանդիսանում է Google-ի մայր ընկերությունը, կտրուկ փոխել է դիրքերը արհեստական բանականության մրցավազքում՝ առաջ անցնելով OpenAI-ից։ Reuters-ի տվյալներով՝ դեռ մեկ տարի առաջ ներդրողները Google-ին համարում էին հետ մնացած, սակայն այժմ Wall Street-ը այն դիտարկում է որպես ոլորտի առաջատար՝ շնորհիվ Gemini 3 մոդելի հաջող գործարկման և AI ներդրումների արագ եկամտաբերության։

Alphabet-ի ղեկավարությունը վստահ տոնով է հանդես եկել վերջին ֆինանսական հաշվետվությունից հետո՝ նշելով, որ AI ներդրումներն արդեն ապահովում են եկամուտների աճ ամբողջ ընկերության շրջանակում։ Ընկերությունը դիտարկում է 2026 թվականին կապիտալ ծախսերի գրեթե կրկնապատկումը՝ հասցնելով դրանք 175–185 միլիարդ դոլարի։ Google-ի գործադիր տնօրեն Սունդար Փիչայի խոսքով՝ Gemini հավելվածն արդեն ունի ավելի քան 750 միլիոն ամսական ակտիվ օգտատեր, իսկ կորպորատիվ տարբերակն ունի շուրջ 8 միլիոն վճարովի լիցենզիա։

Չնայած մեծ ծախսերը սկզբում մտահոգել էին ներդրողներին, Google Cloud-ի եկամուտների 48 տոկոս աճը և AI-ի դրական ազդեցությունը ամբողջ բիզնեսի վրա վերականգնել են շուկայի վստահությունը։ Այդ ֆոնին Alphabet-ի բաժնետոմսերը վերջին ամիսներին աճել են շուրջ 36 տոկոսով, մինչդեռ OpenAI-ի հետ սերտ կապ ունեցող մի շարք տեխնոլոգիական հսկաների արժեթղթերը նվազել են։ Վերլուծաբանների գնահատմամբ՝ շուկան այժմ նախապատվությունը տալիս է Google-ին՝ հաշվի առնելով դրա ֆինանսական կայունությունն ու ինքնուրույն AI էկոհամակարգը։