WSJ․ ՆԱՏՕ-ն պարտություն է կրել՝ Ռուսաստանի ներխուժումը մոդելավորող զորավարժությունների ընթացքում

ՆԱՏՕ-ի երկրները պարտություն են կրել զորավարժությունների ընթացքում, որոնք մոդելավորել են Ռուսաստանի հնարավոր ներխուժումը Լիտվա։ Այդ մասին գրում է The Wall Street Journal-ը՝ վկայակոչելով Die Welt-ի և Հելմուտ Շմիդտի համալսարանին կից Գերմանական ռազմական խաղերի կենտրոնի համատեղ կազմակերպած սիմուլյացիայի արդյունքները։

Զորավարժությունների նպատակն էր գնահատել Բալթյան երկրների և ՆԱՏՕ-ի պատրաստվածությունը հիպոթետիկ ռազմական սցենարի դեպքում։ Դրանց մասնակցել են Գերմանիայի և ՆԱՏՕ-ի նախկին բարձրաստիճան պաշտոնյաներ, օրենսդիրներ և անվտանգության փորձագետներ։ Ավստրիացի ռազմական վերլուծաբան Ֆրանց-Շտեֆան Գադի-ի խոսքով՝ սիմուլյացիայի ընթացքում «ռուսական կողմին» հաջողվել է հաղթել, քանի որ ենթադրվել է, որ Գերմանիան կդրսևորի երկմտանք, ինչը բավարար է եղել հակառակորդի հաղթանակի համար։

Հոդվածում նշվում է, որ ԱՄՆ-ի առաջնորդության բացակայության պայմաններում ռուսական կողմը ընդամենը մի քանի օրում կարողացել է հաստատել գերակայություն Բալթյան տարածաշրջանում։ Ավելի վաղ նաև հայտարարվել էր, որ Գերմանիան պատրաստվում է ստանձնել ՆԱՏՕ-ի զորքերի արևելյան ուղղությամբ տեղափոխման հիմնական լոգիստիկ կենտրոնի դեր, ինչը վկայում է տարածաշրջանում անվտանգության լարվածության աճի մասին։