Amazon-ի բաժնետոմսերը նվազել են՝ արհեստական բանականության վրա հսկայական ներդրումների ֆոնին

Ամերիկյան տեխնոլոգիական հսկա Amazon-ի բաժնետոմսերը կտրուկ նվազել են ընկերության եռամսյակային հաշվետվության հրապարակումից հետո։ NASDAQ բորսայում երեկոյան առևտրի ընթացքում անկումը հասել է մոտ 10 տոկոսի, թեև հիմնական սեսիայի ավարտին այն նվազել է մինչև շուրջ 4,4 տոկոս, հայտնում է Bloomberg-ը։

Ընկերության եկամուտը աճել է 14 տոկոսով՝ հասնելով 213,4 միլիարդ դոլարի, իսկ մաքուր շահույթը կազմել է մոտ 21,2 միլիարդ դոլար, ինչը հիմնականում համապատասխանում էր վերլուծաբանների սպասումներին։ Սակայն ներդրողների անհանգստությունը պայմանավորված է ընկերության ծրագրած ծախսերով արհեստական բանականության ոլորտում՝ ներառյալ չիպերի, սարքավորումների և տվյալների մշակման կենտրոնների զարգացումը։

Amazon-ը նախատեսում է 2026 թվականին այս ուղղությամբ ներդնել մոտ 200 միլիարդ դոլար։ Միջոցների մի մասը կուղղվի արբանյակների արձակմանը՝ SpaceX-ի Starlink-ին մրցակցող համակարգ ստեղծելու համար, սակայն հիմնական ներդրումները վերաբերում են արհեստական բանականությանը։ Ընկերության գործադիր տնօրեն Էնդի Ջեսսին վստահեցրել է, որ Amazon-ը կշարունակի ակտիվ ներդրումները՝ ոլորտում առաջատար դիրք գրավելու նպատակով, թեև շուկան այս ռազմավարությանը արձագանքել է զգուշավորությամբ։